އެންމެ ލުއިލުއިކޮށް އެންމެ ފަސޭހައިން ހެޔޮކަމުގެ ތިލަފަތް ބަރުކޮށްލެވޭނެ ޢަމަލަކީ ކޮބައި ހެއްޔެވެ؟ ޝައްކެއްނެތެވެ. އެއީ ﷲ ސުބުޙާނަހޫ ވަތަޢާލާ ހަނދުމަކުރުމެވެ. މިއީ މާތްކަމާއި މަތިވެރިކަން ވަރަށް ބޮޑު ޢަމަލެކެވެ. މާތްﷲ ހަނދުމަކުރުމަކީ ޣާފިލުކަމުން އިންސާނާ ދުރުހެލިކޮށްދޭ ކަމެކެވެ. އެއީ ޢާލަމްތަކުގެ ވެރި ރަސްކަލާނގެއާއި އިންސާނާއާ ދެމެދު ބަދަހި ގުޅުމެއް އުފައްދައިދޭ ކަމެކެވެ. މާތްﷲ ވަޙީކުރައްވާފައިވަނީ، ތިޔަބައިމީހުން ތިމަންރަސްކަލާނގެ މަތިން ހަނދުމަކުރާށެވެ! އޭރުން ތިމަންރަސްކަލާނގެ ތިޔަބައިމީހުންގެ މަތިން ހަނދުމަކުރާ ހުށީމެވެ. އަދި ތިމަންރަސްކަލާނގެއަށް ޝުކުރުވެރިވާށެވެ. އަދި ކުފުރުވެރި ނުވާށެވެ.
ޒިކުރުކުރުމުގެ މާތްކަމާއި މަތިވެރިކަން ބަޔާންކުރައްވައި، މި އުއްމަތުގެ މާތް ނަބީއާ މުޙައްމަދު ރަސޫލުﷲ ޞައްލަﷲ ޢަލައިހި ވަސައްލަމަ ޙަދީސްކުރައްވާފައި ވެއެވެ. އެންމެ މާތް، އެންމެ ޠާހިރު، އެންމެ މަތީ ދަރަޖައިގެ އަމަލަކީ ޒިކުރުކުރުމެވެ. އެއީ ﷲގެ މަގުގައި ހޭދަކުރުމާއި (ޞަދަޤާތްކުރުމާއި) ޖިހާދުކުރުމަށް ވުރެ ވެސް މާތްކަން ބޮޑު ޢަމަލެކެވެ.
ޒިކުރުކުރުމަކީ ކޮބައި؟
ޒިކުރުކުރުމަކީ ﷲ ސުބުޙާނަހޫ ވަތަޢާލާގެ މަތިން ހަނދުމަކުރުމެވެ. އެކަމަށް ޓަކައި ކުރެވިދާނެ ތަފާތު ކަންކަން ހުރެއެވެ. އެގޮތުން ބަލާއިރު ނަމާދަކީ މޮޅުއިތުރުވެގެންވާ ޒިކުރެކެވެ. ކީރިތި ގުރުއާނަކީ ވެސް ޒިކުރެކެވެ. ކީރިތި ގުރުއާނަށް “ޒިކުރު”ގެ ނަމުން ނަން ދެއްވާފައި ވެސް ވެއެވެ. މީގެ އިތުރުން ޒިކުރުގެ ގޮތުގައި އައިސްފައިވާ ކަލިމަތައް ވެސް ހުރެއެވެ. އޭގެތެރޭގައި سبحان الله، الحمدلله، الله اكبرފަދަ އެތައް ކަލިމައެއް ހިމެނެއެވެ. މި ތަކެތި ގިނަގިނައިން ކިޔުމަކީ ޒިކުރުކުރުމެވެ. އަދި ﷲ ސުބުޙާނަހޫ ވަތަޢާލާ ޚަލްޤުކުރައްވާފައިވާ ތަކެތީގެ ފުރިހަމަކަމާއި އެކަލާނގެ ކުޅަދުންވަންތަކަމާ މެދު ވިސްނައި ފިކުރުކުރުމަކީ ވެސް ޒިކުރު ކުރުމެވެ.
އެންމެ މާތް ޒިކުރަކީ ކޮބައި؟
ޒިކުރުތަކުގެ ތެރޭގައި ހިމެނޭ އެންމެ މާތް، މަތިވެރި ޒިކުރަކީ ނަމާދުކުރުމާއި ކީރިތި ޤުރުއާން ކިޔެވުމެވެ. ނަމާދާއި ޤުރުއާން ފިޔަވައި އެންމެ މާތް ޒިކުރަކީ لااله الاالله މި ޒިކުރެވެ. ﷲ ސުބުޙާނަހޫ ވަތަޢާލާ، މޫސާގެ ފާނަށް އަންގަވައި ވަހީކުރައްވާފައިވަނީ، ހަތް އުޑާއި ހަތް ބިމާއި އެ ދެމެދުގައި ވާހައި ތަކެއްޗެއް ތިލަފަތެއްގެ އެއް ކޮޅަށް ލާފައި، އަނެއް ކޮޅަށް لااله الاالله މި ޒިކުރު ލައިފި ނަމަ ބަރުވާނީ، لااله الاالله ގެ ކޮޅު ކަމަށެވެ. ކަން މިހެން އިތް ނަމަވެސް، އެކި ވަގުތުތަކުގައި ކިޔަން ރަނގަޅު، އަދި އެ ވަގުތަކަށް މޮޅުއިތުރުވެގެންވާ ޚާއްޞަ ޒިކުރުތަކެއް ވަނީ ކަނޑައެޅިފައެވެ. މިސާލަކަށް ދަންނަވާ ނަމަ ނަމާދަށްފަހު ކިޔަން އެންމެ މޮޅު އިތުރުވެގެންވާނީ، އެ ވަގުތަކަށް ކަނޑައެޅިފައި ހުރި ޒިކުރުތަކެވެ. ހަމަ އެ ފަދައިން ހެނދުނާއި ހަވީރު ކިޔަން ޚާއްޞަވެފައި ހުރި ޒިކުރުތައް އެ ވަގުތަށް މޮޅުއިތުރުވެގެން ވެއެވެ.
ޒިކުރު ނުކުރެވޭނެ ވަގުތެއް އޮވޭތަ؟
ޒިކުރުކުރާކަށް ވަކި ވަގުތެއް ވަކި ހާލަތެއް ނެތެވެ. ކޮންމެ ވަގުތަކު ވެސް، ކޮންމެ ހާލަތެއްގައި ވެސް، ޒިކުރު ކުރެވޭނެއެވެ. މިއީ އެންމެ ލުއިފަސޭހަ އަމަލެވެ. ޒިކުރު ކުރުމަށް ޓަކައި، ވުޟޫކުރާކަށް ނުޖެހެއެވެ. ހައިޟު ނިފާސްކަމުން ޠާހިރުވާކަށް ވެސް ނުޖެހެއެވެ. ކޮޅަށް ހުރެ ވެސް، އިށީނދެ އިނދެ ވެސް، އޮށޯވެ އޮވެ ވެސް، ދުއްވާ އެއްޗަކަށް ސަވާރުވެ ދަތުރުކުރަމުން ވެސް ޒިކުރުކުރެވޭނެއެވެ. އެހެންނަމަވެސް ފާޚާނާތެރޭގައި ހޭދަކުރާ ވަގުތުތަކުގައި ޒިކުރު ކުރުމަކީ ރަނގަޅުކަމެއް ނޫނެވެ.
ޒިކުރުކުރުމަކީ ހެޔޮކަމުގެ ތިލަފަތް ބަރުކޮށްލުމަށް ޓަކައި ކުރެވިދާނެ ވަރަށް ލުއި، އެހައިމެ ފައިދާ ބޮޑު އަމަލެކެވެ. އެހެންކަމުން ގިނަގިނައިން ޒިކުރުކޮށް، އެ ކަމުން ނަފާ ހޯދުމަށް ލޯބިކުރަމާތޯއެވެ. ޒިކުރުކުރުމުގެ އާދަ އަށަގަންނުވަން މަސައްކަތް ފަށަމާތޯއެވެ. ލިބޭ ސަވާބާއި ދަރުމައިގެ އިތުރުން، ހިތަށާއި ނަފުސަށް ލިބޭ ވަރަށް ބޮޑު ހަމަޖެހުމަކަށް އެ ކަން ވާނެއެވެ.
މައުލޫމާތު: އިލްމުވެރިންގެ ދަރުސްތަކުން
Be the first to comment