ފުރަބަންދުގައި ގޭގައި ތިބެންޖެހުމުގެ ސަބަބުން، ކުރިމަތިވާ މައްސަލަތަކާ މެދު ދަރިވަރުން ހޭލުންތެރިކުރުމަށް ބާއްވާ ސެޝަންތަކުގެ ޕްރޮޕޯޒަލް

ސުވާލު:

ކޮވިޑް 19ގެ ފުރަބަންދާ ގުޅިގެން، އިސްކޫލްތަކުގައި ކިޔަވައިދިނުން އޮންލައިން ޕްލެޓްފޯމުތަކަށް ބަދަލުވެ، ދަރިވަރުން ގޭގައި ތިބެން ޖެހުމުގެ ސަބަބުން، އެ ކުދިންނަށް ނޭދެވޭ އަސަރުތައް ދަނީ ކުރަމުންނެވެ. އެހެންކަމުން މި މައްސަލަތަކާމެދު ދަރިވަރުން ހޭލުންތެރިކުރުވުމަށް ޓަކައި، މައުލޫމާތު ދޭ ސެޝަންތަކެއް ކުރިޔަށް ގެންދިއުމަށް ބޭނުންވާތީ، އެ ކަން ކޮށްދޭނެ ފަރާތެއް ހޯދުމަށް މިނިސްޓްރީ އޮފް އެޑިޔުކޭޝަނުންވަނީ އިޢުލާންކޮށްފައެވެ. މި މަސައްކަތަށް ޝައުގުވެރިކަން ފާޅުކޮށް، “ސޮސައިޓީ ފޮރ ޕަބްލިކް ހެލްތު އެޑިޔުކޭޝަން”އިން މިނިސްޓްރީ އޮފް އެޑިޔުކޭޝަނަށް ބިޑް ހުށަހަޅާނެ ޕްރޮޕޯސަލެއް ލިޔާށެވެ! މި ޕްރޮޕޯސަލްގައި މި ސެޝަންތައް ކުރިޔަށް ގެންދާނެގޮތާއި ފަންނީ އެހީތެރިކަން ހޯދާނެގޮތާއި އެކަން ކޮށްދޭނެ އަގާއި މުއްދަތު ބަޔާންކުރަންވާނެއެވެ.

ތަޢާރަފު:

މިއީ ކޮވިޑް 19 އާ ގުޅިގެން ދިވެހި ގައުމު ފުރަބަންދުވެ، ދަރިވަރުން ގޭގައި ތިބެން ޖެހުމުގެ ސަބަބުން ކުރިމަތިވާ މައްސަލަތަކާ މެދު ދަރިވަރުން ހޭލުންތެރިކުރުވުމަށް ޓަކައި، މައުލޫމާތު ދޭ ސެޝަންތައް ކުރިޔަށް ގެންދިއުމަށް ރާވާފައިވާ ގޮތް ބަޔާންކޮށް ހުށަހަޅާ ޕްރޮޕޯސަލެކެވެ. މި ޕްރޮޕޯސަލްގައި މި ސެޝަންތައް ކުރިޔަށް ގެންދާނެގޮތާއި ފަންނީ އެހީތެރިންގެ އެހީތެރިކަން ހޯދާނެގޮތާއި މުއްދަތުގެ އިތުރުން، މި މަސައްކަތަށް ހުށަހަޅާ އަގު ބަޔާންކޮށްފައިވާނެއެވެ.

ސެޝަންތައް ކުރިޔަށް ގެންދާނެގޮތް

މި ސެޝަންތައް ކުރިއަށް ގެންދާނީ ޒޫމް މެދުވެރިކޮށް، އޮންލައިން ޕްލެޓްފޯމެއްގައި މުޅި ރާއްޖޭގެ ހުރިހައި އިސްކޫލުތަކަށް ހުޅުވާލައިގެންނެވެ. އެގޮތުން ކޮންމެ ދުވަހެއްގެ މެންދުރުކުރީގެ ދަންފަޅިއަކާއި މެންދުރުފަހުގެ ދަންފަޅިއެއް ކުރިއަށް ގެންދެވޭނެއެވެ. މިއިން ކޮންމެ ދަންފަޅިއެއްގައި 3 ގަޑިއިރުގެ ސެޝަނެއް ކުރިއަށް ގެންދަން ވަނީ ނިންމާފައެވެ. މި ސެޝަންތައް ކުރިއަށް ގެންދާއިރު، ފުރަބަންދާ ގުޅިގެން ދަރިވަރުން ގޭގައި ތިބޭންޖެހުމުގެ ސަބަބުން އެ ކުދިންނަށް ނަފުސާނީ ގޮތުންނާއި ޖިސްމާނީ ގޮތުން ލިބޭ ގެއްލުންތަކާ މެދު ހޭލުންތެރި ކުރުމަށް ޓަކައި މައުލޫމާތު ފޯރުކޮށްދެވޭނެއެވެ. އަދި ކިޔެވުމަށާއި އިޖުތިމާއީ ގުޅުންތަކަށް ކުރާ ނޭދެވޭ އަސަރުތަކާ މެދު ވެސް، ދަރިވަރުން ހޭލުންތެރިކުރުމުގެ ގޮތުން މައުލޫމާތު ދެވޭނެއެވެ.

މުއްދަތު

މި ތަމްރީނު ސެޝަންތައް ކުރިއަށް ގެންދަން ގަސްދުކޮށްފައިވަނީ 5 ދުވަހުގެ މުއްދަތަށެވެ. އެ ގޮތުން ފުރަތަމަ 2 ދުވަހު އޮންނާނީ ޖިސްމާނީ ގޮތުންނާއި ނަފުސާނީ ގޮތުން ދިމާވާ މައްސަލަތަކާ މެދު ދަރިވަރުން ހޭލުންތެރި ކުރުމުގެ ހަރަކާތްތަކެވެ. 3 ވަނަ ދުވަސް ޚާއްޞަކުރާނީ އިޖުތިމާޢީ ގުޅުމަށް ކުރާ ނޭދެވޭ އަސަރާ މެދު ދަރިވަރުން ހޭލުންތެރި ކުރުމަށެވެ. އެންމެ ފަހު 2 ދުވަހު އޮންނާނީ، ކިޔެވުމަށް ކުރާ ނޭދެވޭ އަސަރުތަކާ މެދު ދަރިވަރުން ހޭލުންތެރިކުރުމުގެ ގޮތުން މައުލޫމާތު ދިނުމެވެ.

ފަންނީ އެހީތެރިކަން ހޯދާނެގޮތް

މި ސެޝަންތައް ކުރިއަށް ގެންދާއިރު، ކަމާ ގުޅުންހުރި ދާއިރާތަކުން ފަންނުވެރި ބޭބޭފުޅުންގެ ފަންނީ އެހީތެރިކަން ހޯދަން ވަނީ ގަސްތުކޮށްފައެވެ. އެގޮތުން ޖިސްމާނީގޮތުންނާއި ނަފުސާނީގޮތުން ލިބޭ ގެއްލުންތަކާ މެދު ދަރިވަރުން ހޭލުންތެރިކުރުމަށް ޓަކައި، އައިޖީއެމްއެޗުގެ ތަޖުރިބާކާރު ޑޮކްޓަރުން މައުލޫމާތު ދެއްވާ ގޮތަށް ވަނީ ހަމަޖެހިފައެވެ. މީގެއިތުރުން ދަރިވަރުންގެ އިޖުތިމާއީ ގުޅުމަށް ކުރާ ނޭދެވޭ އަސަރުތަކާ މެދު ހޭލުންތެރިކުރުމަށް ޓަކައި، އިސްލާމިކް ޔުނިވަރސިޓީގެ ގާބިލު މުވައްޒަފުން މައުލޫމާތު ދެއްވާނެއެވެ. އަދި ދަރިވަރުންގެ ކިޔެވުމަށް ކުރާ ނޭދެވޭ އަސަރުތަކާ މެދު ހޭލުންތެރިކުރުމުގެ ގޮތުން މިނިސްޓްރީ އޮފް އެޑިޔުކޭޝަންގެ ކަމާ ގުޅޭ ފަރާތްތަކުގެ ފަންނީ އެހީތެރިކަން ހޯދާން ވަނީ ހަމަޖައްސާފައެވެ.

ސެޝަންތަކަށް ހުށަހަޅާ އަގު

މި ސެޝަންތަކަށް މައުލޫމާތު ދެއްވަން ވަޑައިގަންނަވާ ފަންނީ އެހީތެރިންގެ އުޖޫރައަށް 35000 ރުފިޔާ ހުށަހަޅާއިރު، ސެޝަންތައް ރާވާ އިންތިޒާމުކުރުމަށް ހުށަހަޅާ އަގަކީ 15000 ރުފިޔާއެވެ. މީގެއިތުރުން މި ސެޝަންތައް ކުރިއަށް ގެންދިޔުމަށް ބޭނުންވާ ލިޔެކިޔުމުގެ ތަކެތީގެ އަގުގެ ގޮތުގައި ހުށަހަޅާ އަގަކީ 2500 ރުފިޔާއެވެ. އެހެންކަމުން މި ސެޝަންތަކަށް ހުށަހަޅާ ޖުމުލަ އަގަކީ 52500 ރުފިޔާ (ފަންސާސް ދެ ހާސް ފަސް ސަތޭކަ ރުފިޔާ) އެވެ.

ނިންމުން

މި ފަދަ ސެޝަންތައް ކުރިޔަށް ގެންދެވިއްޖެ ނަމަ، ފުރަބަންދާ ގުޅިގެން ދަރިވަރުންނަށް ދިމާވެފައިވާ މައްސަލަތައް ހައްލުކުރުމަށް މަގުފަހިވެގެންދާނެއެވެ. މި ޖަމިއްޔާއަކީ، މިފަދަ ކަންކަމުގައި 10 އަހަރުގެ ތަޖުރިބާ ލިބިފައިވާ ފަރާތެކެވެ. އެހެންކަމުން މި ޕްރޮޕޯސަލްގައިވާ ކަންކަމަށް ރިޢާޔަތްކުރައްވައި، މި ސެޝަންތައް ކުރިޔަށް ގެންދިޔުމުގެ ފުރުޞަތު އަޅުގަނޑުމެންނަށް ދެއްވުމަށް އެދި ހުށަހަޅަމެވެ.