ހިތްފަސޭހަ ފަތިހެކެވެ. ފަސްގަޑި ބައިވެއްޖެކަމުގެ އިޢުލާނު ކުރުމަށް ޓަކައި، ގަޑީގެ ކަށިތައް ފަށައިގެން އުޅޭ ދަތުރަށް ނިމުން އަންނަނީއެވެ. ރަތް ރީނދޫ ކުލައިން އުޑުމަތި ދޮން ކުރަމުން ދަނީ، އުދަވުމަށް ތައްޔާރުވަމުން އަންނަ އިރަށް އިސްތިޤުބާލުކުރުމަށެވެ. އިރުމަތީ ބިތުން، ކަނޑުގެ ސަތަހައިގައި ބީހިލާފައި އަންނަ ފިނިފިނި ވައިރޯޅި އައިސް ގައިގައި ފިރުމައިލަނީ، އެ ފަދަ ދެވަނަ ރޯޅިއަކަށް ދަހިވެތިކުރުވަމުންނެވެ. ޖެހޭ ވައިރޯޅިއާ ބައިވެރިވެގެން، މަގުގެ ދެ ފަރާތުގައި ތިބެ ނަށަމުން ގެންދާ ދަނބު ގަސްތަކުގެ އުފާވެރިކަމަށް ހުރަސްއަޅަމުން ގެންދިޔައީ، އެ ގަސްތަކުގައި ތިބެ ހަޅޭއްފަޅޭއްޖަހަމުން ގެންދާ ކާޅުތަކުގެ އެކުވި އަޑުންނެވެ. މި ހަމަހިމޭން ފަތިހުގައި، ހަމަހިމޭންކަން ފޫދުއްވައިލަން އެ ސޮރުމެން މަސައްކަތްކުރާ ކަހަލައެވެ.
ތަނަކީ ހުޅުމާލެއެވެ. ރާއްޖޭގެ އެތައް ބަޔެއްގެ ދިރިއުޅުން އެތަނަކާ ލާމެހެމުން އަންނަ ހެދިބިމެވެ. މަގަކީ ހުޅުމާލޭގެ ފުރަތަމަ ފިޔަވަހީގެ މަގެކެވެ. ސަހަރާ މިސްކިތް އެ މަގަކަށް ނިސްބަތްވާ “ސައިމާ މަގު”އެވެ. ފަތިސްނަމާދުގެ އަޅުކަމަށްފަހު، މިސްކިތުން ފައިބައިގެން، ހުޅަނގުން އިރަށް ހިނގައިގަތީ، މާ ބޮޑު ޚިޔާލެއް ފިކުރެއް ނެތިއެވެ. ފަތިހުގެ ތެތް ފިނިން ހިތަށް ފިނިކަމެއް ހޯދައި ދިނުމަށެވެ. ހައްޓަށް ދިރުމެއް ލިއްބައިދިނުމަށެވެ.
އާދައިގެ ހިނގުމެއްގައި މަގުގެ ވާތްފަރާތު ދުވާރުމަތިން ގޮސް، އެ މަގުގައި ހުރި ކެފޭތަކުން ކެފޭއަކާ އަރައިހަމަވިތަނާ، ދެބައި އުމުރުގެ ފިރިހެނަކު އެ ކެފޭ ތެރެއިން ނިކުމެއްޖެއެވެ. އޭރު ކެފޭގެ ކުރިމަތިން ދުވާރުގެ މަގާވީ ފަރާތުގައި، ކަޅާއި ހުދުގެ ބުޅަލެއް އޮށޯވެލައިގެން، ކާއެއްޗެއްގެ އިންތިޒާރުގައި އޮތެވެ. ކެފޭއިން ނިކުތް މީހާ، އެ ބުޅަލާ ދިމާއަށް ބަލައިލުމަށްފަހު، ފިހެފައި އޮތް ސޮސެޖެއް އެއްލައިފިއެވެ.
ސޮސެޖު ގޮސް ދުވާރުމަތީގައި ޖެހުމާ އެކު، މަޑުމަޑުން އޮތް ބުޅާ، ފުންމައިގެން ތެދުވެއްޖެއެވެ. ލިބުނު ނިޢުމަތަށް އުފާކުރަމުން، އަވަސް އަވަހަށް އައިސް، އެ ސޮސެޖުގެ މައްޗަށް ޖެހިގެންފިއެވެ. އަދި ލަހެއްފަހެއް ނެތި ވަގުތުން ކާން ވެސް ފަށައިފިއެވެ. ވަރަށް މީރުކޮށެވެ. މި މަންޒަރު ފެނިފައި، ތަންކޮޅެއް ދުރުގައި އޮތް އެހެން ބުޅަލެއް، އެ ދިމާއަށް އަތުވެއްޖެއެވެ. އެ ބުޅާ ދުވެލާފައި އައިސް، ސޮސެޖު އެއްލި މީހާގެ ފައި ބުޑުގައި މަޑުކޮށްލަމުން، މަޑުމަޑުން “މިއާއޯ” އޭ ގޮވާލައިފިއެވެ. “މަށަށް ވެސް ސޮސެޖެއް ދޭށޭ” ބުނާ ފަދަ ގޮވައިލުމެކެވެ.
ސޮސެޖް އެއްލި މީހާ އޭނާގެ އަތުގައި އޮތް އެހެން ސޮސެޖެއް އެ ބުޅަލަށް ދީފިއެވެ. އޭރު ވެސް ކުރިން ސޮސެޖް ލިބުނު ބުޅާ، ހޭވައްޓާލައިފައި ސޮސެޖު އިރައި، ކަމުން ގެންދެއެވެ. ލޮލުގެ ކުޑަކޮޅުން ވެސް އެހެން ދިމާއަކަށް ބަލައިނުލައެވެ. ހީވަނީ އެހެން ބުޅަލެއް އަންނާންވާ އިރަށް ކައި ހުސްކޮށްލެވޭތޯ އުޅޭހެންނެވެ.
ފަހުން އައި ބުޅަލަށް ސޮސެޖު ލިބުމުން، ކަން ކުރީ އަނެއް ބުޅަލާ މުޅިން ތަފާތުކޮށެވެ. ކާން ފެށުމުގެ ބަދަލުގައި، ތުނބުލައިގެން އައި ކޮޅަށް ނައްޓައިލީއެވެ. މަޑު ދުވެއްޔެއްގައެވެ. އެއީ އާންމު ގިނަ ބުޅާތަކާ ތަފާތު އުސޫލެކެވެ. ގިނަ ބުޅަލުގެ އާދައަކީ، އެ ގޮތަށް ކާއެއްޗެއް ލިބިއްޖެ ނަމަ، އެ އޮތް ތަނުގައި އޮވެ އަވަސްއަވަހަށް ކައި ހުސްކޮށްލުމެވެ. އެހެންނަމަވެސް މި ބުޅާ ދުވެގަތީ ސޮސެޖް ހިފައިގެން ދުރަށެވެ. އެހެންކަމުން މި އެތި ކަންކުރާ ގޮތެއް ދެކޭހިތުން، ދިހަވަރަކަށް ފޫޓު ފަހަތުން ހިނގައިގެންފީމެވެ.
ސޮސެޖު ތުނބުލައިގެން ބުޅާ ދުވަމުންދުވަމުން ގޮސް ވަނީ ގާތްގަނޑަކަށް އެ މަގުގެ ހަތްދިހަވަރަކަށް ފޫޓު ދުރުގައި އޮތް ފަޅު ގޯއްޗެއް ތެރެއަށެވެ. އެއީ އެކި ކަހަލަ ހުއިގަސްތަކާއި ވެޔޮތަކާއި ވިނަތަކުން ފުރިފައި އޮތް ހުސް ބިމެކެވެ. އެ ސޮރު އެ ތަނަށް ވަނުމާ އެކު، ކަންފަތުގައި ޖެހުނީ ކުޑަ ބުޅަލެއް، އޭގެ ޅަ އަޑުން ގޮވާލި އަޑެވެ. ހަމަ އެ ވަގުތު އެ ގަސްތަކުގެ ތެރެއިން، ކިރު ތުނބުން ވީއްލިފައިވާ ކުޑަ ދެ ބުޅާ ދުވެލާފައި އައިސް، އެއްކަލަ ބޮޑު ބުޅާ ކައިރިއަށް މަޑުކޮށްލައިފިއެވެ. އެއީ އެ ބުޅަލުގެ ދެ ދަރިންކަން ފުރަތަމަ ނަޒަރުން ވެސް، ކަށަވަރުވެއްޖެއެވެ. އެހެންކަމުން ދެން ވާ ގޮތެއް ބެލުމުގެ ޝައުޤުގައި މަޑުކޮށްލައިފީމެވެ. ފެނުނީ މަންމަ ބުޅަލުގެ ތުނބުގައި އޮތް ސޮސެޖު، ދެ ދަރީންގެ ކައިރީގައި ބާއްވައިލިތަނެވެ. ކުޑަ ދެ ބުޅާ ވަގުތުން އެ ސޮސެޖަށް އިންސާފުކުރަން ފަށައިފިއެވެ. ދެ ދަރިން މީރުމީރުކޮށް ސޮސެޖު ކަމުން ގެންދިޔަ އިރު، މަންމަ ބުޅާ އެ މަންޒަރު ދެކޭން އޮތެވެ. ހައި ބަނޑާ އެކުގައެވެ. ލޯތްބާއި ކުލުނުން ފުރިފައިވާ ނަޒަރަކުންނެވެ. ދެ ދަރިންގެ ހައިކަން ފިލަމުން ދިޔަވަރަކަށް، މަންމަ ބުޅަލުގެ ބަނޑު ވެސް ފުރެމުން އަންނަ ކަހަލައެވެ.
ކުޑަ ދެ ބުޅާ ސޮސެޖު ކައި ހުސްކޮށްލައިފިއެވެ. މަންމަ ބުޅާ ރަހަ ވެސް ބަލައިނުލައެވެ. ދަރިންގެ ޙައްޤުގައި، ދަރިންގެ ހިމާޔަތުގައި އޮތީއެވެ. ކޮން ފަދަ ރީތި މިސާލެއްހެއްޔެވެ. ކޮން ފަދަ ބޮޑު ޤުރުބާނީއެއްހެއްޔެވެ. ކޮން ފަދަ އަގު މާތް ގުޅުމެއްހެއްޔެވެ. މި މަތިވެރި ގުޅުމާ މެދު ވިސްނައި ލެވުމުން ދެ ލޮލުން ކަރުނަ ނިރައިލިއެވެ.
ހިތަށް އެރިއެވެ. ﷲ ސުބުޙާނަހޫ ވަތަޢާލާގެ ކުޅަދުންވަންތަކަމެވެ. ޖަނަވާރުންގެ ކިބައިގައި ވެސް މައިވަންތަކަމުގެ ލޯތްބި ޖެއްސެވި އިލާހުގެ މަތިވެރިކަމެވެ. ދަރިކުލުނު ލެއްވި ކަލާނގެ ހުސްޠާހިރުވަންތަކަމެވެ. އެ ކަލާނގެއަށް ނިމުމެއް ނެތް ޝުކުރެވެ. ތިން ބުޅާ އެ ފަޅު ގޯތިތެރެއަށް ދޫކޮށްލާފައި މަޑުމަޑުން ކުރިއަށް ފިޔަވަޅުއަޅާންފެށީމެވެ. މި ހިތްފަސޭހަ ފަތިހުގެ ތެތް ފިނިން ލިބުނު ފިނިކަމަށް ވުރެ ބޮޑު ފިނިކަމެއް، މި އުފާވެރި މަންޒަރުން ހިތަށާއި ހަށްޓަށް ލިބުނުކަމުގެ އިހުސާސްކުރެވުނެވެ.
ނިމުނީ
Be the first to comment