ގޮނގުރިޓު ހާއްޔަކުން ، ވިދުންގަދަ ފެހި މުތެއް

ސުވާލު:

ހއ. މާރަންދޫ ޢަލީ ޢީސާއަކީ އަމިއްލަ ވެބްސައިޓެއް ހަދައިގެން ތަފާތު އެކި މައުޟޫޢުތަކަށް އާޓިކަލްތަކާއި ލިޔުންތައް ލިޔަމުން އަންނަ ހުނަރުވެރި ލިޔުންތެރިއެކެވެ. އޭނާގެ މި ހަފުތާގެ ލިޔުން ޚާއްޞަކުރީ، ރަސްރަނި ބަގީޗާގެ ނަމުގައި ތަރައްޤީކޮށް ހުޅުވި، މިއަދުގެ ސަލްޓަންޕާކަށެވެ. އެ ލިޔުމުގައި ސަލްޓަންޕާކުގެ ރީތިކަމާއި ފުރިހަމަކަން އޭނާ ބަޔާންކުރީ، ކުޑަކުދީންނާއި ޒުވާނުންނާއި އެހެނިހެން ފަރާތްތައް ވެސް ސަލްޓަންޕާކަށް ޒިޔާރަތްކުރުވުމަށް ބާރުއަޅާ ފަދަ ގޮތަށެވެ. ތިޔައީ ހއ. މާރަންދޫ ޢަލީ ޢީސާކަމުގައި ބަލައިގެން، ސަލްޓަންޕާކުގެ ފުރިހަމަކަމާއި ރީތިކަމުގެ މައްޗަށް އަލިއަޅުވާލައި، އެ ތަނަށް މީހުންގެ ހިތްޖެހޭ ފަދަ މޭރުމަކުން ފީޗަރއަރޓިކަލެއް ލިޔާށެވެ!

ގޮނގުރިޓު ހާއްޔަކުން ، ވިދުންގަދަ ފެހި މުތެއް

ގޮނގުރިޓުގެ ރަސްކަން ހިނގަމުން އަންނަ މާހައުލަކުން، އާރޯކަމާއި ފެހިކަން އެކުލެވޭ ހިތްގައިމު ބަގީޗާއެއް ފެނިއްޖެ ނަމަ، ހިތަށް ލިބޭނީ އާދަޔާޚިލާފު ފިނިކަމެކެވެ. ދައްކަން މި އުޅެނީ މި ފަދަ ގޮނގުރިޓްގެ މާހައުލެއްގައި، ލޮނުފެނުގެ ބިމެއްގައި، ފެހިކުލައިގެ މުތެއް ފަދައިން ވިދަވިދާ އޮތް ބަގީޗާއެއްގެ ވާހަކައެވެ. ރާއްޖޭގެ ދިގު ރަސްކަމުގެ ސިލްސިލާ ނިމި، ރަސްކަމުގެ ގަނޑުވަރު ހުރި ސަރަޙައްދަށް އައި ބަދަލާއެކު 1968 ވަނަ އަހަރު ވުޖޫދުވި “ސަލްޓަންޕާކް”ގެ ވާހަކައެވެ. އޭގެ 50 އަހަރު ފަހުން، ޒަމާނީ ބަދަލުތަކާއެކު ދިރުވައި ކުލަޖެއްސުމަށްފަހު، 2017 ވަނަ އަހަރުގެ އޯގަސްޓްމަހު “ރަސްރަނި ބަގީޗާ”ގެ ނަމުގައި ހުޅުވި، އެހެނަސް މިއަދުގެ “ސަލްޓަންޕާކް”ގެ ވާހަކައެވެ.

ކުޑަ ކުދީންނަށް ޓަކައި ސަލްޓަންޕާކު ކުރާ އިންތިޒާރަކީ، ވަރަށް ވެސް ޚާއްޞަ އިންތިޒާރެކެވެ. އެ ކުދިންގެ ޅަ ހިތްތައް އުފަލުން ފޮޅުވައިލަދިނުމަށެވެ. ދަރީން އުފަލުގައި ބޭތިއްބުމަކީ، ކޮންމެ މަންމައަކާއި ބައްޕައަކު ވެސް އެދޭނެ ކަމެކެވެ. އެހެންކަމުން ދަރިފުޅު އިނގިލިކުރީގައި ލައިގެން ނިކުމެ، ސަލްޓަންޕާކާ ދިމާއަށް އަވަހަށް މިސްރާބު ފަހިކުރާށެވެ! ތިޔަ ބޭނުންވެގެން އުޅޭ އުފާވެރިކަން އެ ތަނުން، އެ ކުދީންނަށް ހޯދައިދެވޭނެއެވެ. އެ ކުދިން ގޮވައިގެން ޖައްވުގައި އުދުހިލާން، އެ ތަނުގައި ހުރި އުނދޯލިތައް އެބަ އިންތިޒާރުކުރެއެވެ. ރީތި މާގަސްތަކާއި ފެންއަރުވާ ވަޑާން އެ ކުދީންނަށް އެބަ ހަނާއަޅައެވެ. މަސްފެންގަނޑާއި އެ ފެންގަނޑުގައި ހުރި ކުލަކުލައިގެ ރީތި މަސްތައް، އެ ކުދީން އުފާކޮށްދިނުމަށް ޓަކައި، ބަނޑިބަނޑި ލައްވަމުން އެބަ ނަށައެވެ. 12 ފޫޓް އުހުގައި ހުރި “ރަސްރަނި ވިއު” އެ ކުދީންގެ ސިކުނޑިއަށް ކާނާ ފޯރުކޮށްދިނުމަށް ޓަކައި، ދަހިވެތިކަމާއެކު އެބަ ބަލައެވެ. މި އުފާވެރި މާހައުލުގައި، މިނިވަން ކޮކާތަކެއް ފަދައިން އުދުހިލާން ފުރުސަތު ދިނުމަށް ޓަކައި، ދަރީންކޮޅު ގޮވައިގެން އަވަހަށް އަންނާށެވެ.

ދެ ޖިންސުގެ ޒުވާނުންނަށް ވެސް ސަލްޓަންޕާކަކީ “ސުވަރުގެ”އެކެވެ. މާޔޫސްވެފައިވާ ހިތްތަކުގެ ޒަމާނީ ފަރުވާއެވެ. އެ ތަނުގެ ފެހިކަން ގަދަ މާހައުލާއި މާމެލާމެލީގެ މީރުވަހާއި ގަސްގަހާގެހި ކިޔައިދޭ ރީތި ނާނާއަކީ، ތިޔަ މޮޅިވެރި ހިތްތަކުގެ ކާނާއަކަށް ނުފުދޭނެ ހެއްޔެވެ؟ ފޫހިވެފައި ފިހެވެން ކޮޓަރިތެރޭގައި ނޯވެ، މި ހިތްފަސޭހަ ޕާކުން ތިޔަ ހައްޓަށް ދިރުން ދޭށެވެ! ބައިވެރިޔާގެ އަތުގައި ހިފާލައިގެން އައިސް ވަދެލަބަލާށެވެ! ފިނިފިނި ވައިރޯޅި އައިސް އުފަލާއެކު ގައިގައި ބައްދައިލާނެއެވެ. ހިލަ ގޮނޑިތަކާއި ބެންޗުތައް، މަދަދުގާރުންގެ ގޮތުގައި ޝަކުވާއެއް ނެތި މަރުހަބާ ކިޔާނެއެވެ. ވަށައިގެން ހެދިފައި ހުރި ރީތި މާ ގަސްތައް، ހިތްހެޔޮކަމާއެކު މީރު ވަސް ފޯރުކޮށްދޭނެއެވެ. ހިޔާބޮޑެތި ގަސްތައް އޯގާވެރިކަމާއެކު ހަށިގަނޑުގައި ފިރުމައިދޭނެއެވެ. ހިތް އުފާކޮށްދިނުމަށް ޓަަކައި ޓްރީ ހައުސް ބްރިޖާއި ގްރީން ޓަނަލާއި ވާޓިކަލް ބަގީޗާ ފޫހިކަމެއް ނެތި ޚިދުމަތުގައި ދެމިތިބޭނެއެވެ. ނަގާ ފޮޓޯތަކުގެ ކުލަ ރީތިކޮށްލަދިނުމަށް ޓަކައި، ފަރިވެ ފޮޅިފައިވާ ކުލަކުލައިގެ މާމެލާމެލި ހިނިތުންވުމާއެކު ބައިވެރިވާނެއެވެ.

ސަލްޓަންޕާކުން އަހަރެމެންނަށް އިންތިޒާރުކުރާ އެންމެ ޚާއްޞަ ތަނަކީ، ޕާކުގެ އިރުދެކުނު ކަނުގައި ހުރި “ވިންޓަ ތީމް ޕާކް”އެވެ. އެންމެ ޒަމާނީ ފެންވަރުގެ ސްނޯ މެޝިންތަކުން މުޅި މާހައުލުގެ ފިނިހޫނުމިން ސުމަކަށްވުރެ ދަށަށް ވައްޓާލާފައި، އެ ވަނީ ހަމަ އަހަރެމެންގެ އުފަލަށް ޓަކައެވެ. ތަފާތު މާހައުލަކުން ތަފާތު އިހުސާސްތަކެއް ފޯރުކޮށްދިނުމުގެ ބޭނުމުގައެވެ. ބޯކޮށް ސްނޯ ފައިބާ ސްނޯގެ ދާނެއްގައި ޢާއިލީ މެންބަރުންނާއެކު ނުވަތަ އެކުވެރިންނާއެކު އުޅެލެވޭކަމުގެ ކުލަ ހުވަފެން ދައްކައިލަ ދިނުމަށެވެ. އެ ތަނުގައި ހުރި ސްލައިޑާއި އައިސް ސްކޭޓިންގ ރިންގަކީ ވެސް، ތަޖުރިބާކޮށްނުލައި ދޫކޮށްލާން ހެޔޮވާވަރުގެ ތަންތަނެއް ނޫނެވެ. އެންޓާޓިކާގައި ދިރިއުޅޭ އެސްކިމޯއިންގެ ފިނިކަން ގަދަ އިހުސާސްތައް، އީކުއޭޓާގައި އުޅޭ އަހަރެމެން ދިވެހީންނަށް ވަޒަންކޮށްލެވޭނީ، ވިންޓަރ ތީމް ޕާކަށް ވަދެލެވުނީމައެވެ.

ނުފުދިފައިވާ ދިރިއުޅުމާއި ބަންދުވެފައިވާ ކޮޓަރިއާއި ތޮއްޖެހިފައިވާ މާހައުލުން ލިބޭ ނުތަނަވަސްކަމަށް، ތަސައްލީއެއް ހޯދައިދޭން ނޭދޭނެ މީހަކު ހުންނާނެ ބާވައެވެ؟ އަމިއްލަ ދިރިއުޅުމާމެދު ވިސްނައިލާން ވަގުތުކޮޅެއް ހޭދަކޮށްލާން ބޭނުންނުވާނެ ފަރާތެއް ހުންނާނެ ބާވައެވެ؟ ދަރިންގެ އުފަލަށް ޓަކައި ވަގުތު ހޭދަކޮށްލާން ބޭނުންނުވާ މަޔަކު ބަފަޔަކު ހުރެދާނެ ބާބައެވެ؟ މި ފަދަ ކޮންމެ ފަރާތަކަށް ވެސް ސަލްޓަންޕާކްގެ ޖާދޫއެއް ފަދަ މާހައުލުގެ ދޮރުތައްހުރީ ހުޅުވިފައެވެ. ސިކުނޑީގެ ބުރަކަމާއި ހިތުގެ ބަރުކަން ކަނޑުވައިލުމަށް ޓަކައި، ސަލްޓަންޕާކާ ދިމާއަށް ފިޔަވަޅުތައް ހަލުއިކުރަމާ ހިނގާށެވެ! އެ ތަނުގެ ނަލަކަމާއި ފަރިކަން “ރަސްރަންޏެއްގެ” ގޮތުގައި ދާއިމަށް ބޭއްވުމަށް ހިތް ނިޔަތް އަދައިގެންނެވެ.

ނިމުނީ