ޓެކްނޮލޮޖީ ބޭނުންކުރާ ގޮތުގެ ސަބަބުން ޒުވާނުންނަށް ލިބޭ ގެއްލުންތައް
ޓެކްނޮލޮޖީ ނުވަތަ ފަންނިއްޔާތަކީ، ވިހަގަދަ ހަތިޔާރަކަށްވުރެ ވެސް ނުރައްކާތެރި އެއްޗެކެވެ. ކީއްވެގެންތޯއެވެ؟ ފަންނިއްޔާތުގެ ވަސީލަތްތައް ބޭނުންކުރެވޭ ގޮތުގެ ސަބަބުންނެވެ. މިއަދު މުޅި ދުނިޔެ މި ވަނީ، ފަންނިއްޔާތުގެ ބާރުގެ ދަށުގައި “ހައްޔަރު” ވެފައެވެ. އެއާ ނުލައި އިންސާނުންނަށް ދިރިއުޅޭން ދަތިވާ ފަދަ އެއްޗަކަށް ވެފައެވެ. އަޅާ ކޮންމެ ފިޔަވަޅަކާއި ލާ ކޮންމެ ނޭވާއަކާ ގުޅިލާމެހިފައިވާ އެއްޗަކަށް ވެފައެވެ. މި ފަދަ މުހިންމު ވަޞީލަތެއް، ވިހަގަދަ ހަތިޔާރެއް ފަދަ އެއްޗަކަށް ވެފައި ވާ ކަމީ، އެއާމެދު ފިކުރު ހިންގާން ޖެހޭ ކަމެކެވެ. ޚާއްޞަކޮށް ޒުވާނުން މި ކަމަށް ދޭންޖެހޭ ސަމާލުކަން ވަކިންބޮޑެވެ. ސަބަބަކީ މީގެ ސަބަބުން ޒުވާނުންނަށް ކުރާ ނޭދެވޭ އަސަރު ބޮޑުވީމައެވެ. އެހެންކަމުން ފަންނިއްޔާތު ބޭނުންކުރާ ގޮތުގެ ސަބަބުން، އަދުގެ ޒުވާނުންނަށް ތަފާތު އެކި ކަހަލަ ގެއްލުންތައް އަންނަނީ ލިބެމުންނެވެ.
ފަންނިއްޔާތުގެ ބޭނުންހިފޭ ގޮތުގެ ސަބަބުން، އެތައް ޒުވާނުންނެއްގެ ޢަޤީދާ ބަލިކަށިވަމުން އަންނަކަމީ، ދެބަސްވެވެން ނެތްހަގީގަތެކެވެ. ފަންނިއްޔާތުގެ ދުނިޔެއަކީ ހެއްލުންތެރި ގެއްލުން ބޮޑު ދުނިޔެއެކެވެ. ފަންނިއްޔާތުގެ ރަސްގެފާނު ކަމަށްވާ އިންޓަނެޓަކީ، ދުނިޔޭގައި ލެއްވި ހުރިހައި ރަހައެއް، އޭގައި ޖެހިފައިވާ ވިއުގައެކެވެ. މި ވިއުގައިގެ ތެރޭގައި، މާތްވެގެންވާ އިސްލާމްދީނުގެ ޢަދުއްވުން ފަތުރާފައި ހުރި ކެހިވެރި އެތައް ދަލެއް ހިމެނެއެވެ. ވިސްނާންޖެހޭ މިންވަރަށް ވިސްނާނުލައި ބޭނުންކުރާން ފަށައިފި ނަމަ، މިއިން ދަލެއްގައި ނުހަނު ފަސޭހައިން ޖެހިދާނެއެވެ. އެކަން މިއަދުގެ ބައެއް ޒުވާނުންގެ ކިބައިން، ފެންނަމުން އެބަ ދެއެވެ. ދީނާ ފުށުއަރާ ކަންކަން ޤަބޫލުކުރާ ޒުވާނުންގެ އަދަދު، އެއް ދުވަހުން އަނެއް ދުވަހަށް އަންނަނީ އިތުރުވަމުންނެވެ. އިސްލާމީ ޝަރީޢަތާ ދެކޮޅަށް ދެކެވޭ ވާހަކަތަކުގައި، ޒުވާނުންގެ އަޑު އަންނަނީ ގަދަވަމުންނެވެ. މަރަށް މަރުހިފުމާ ދެކޮޅު ހަދައެވެ. އެއް ޖިއްސުން ކައިވެނިކުރުމަކީ، މައްސަލައެއް ނޫންކަމަށް ބުނެ ވަކާލާތުކުރެއެވެ. ނަމާދުކުރުމާއި ރޯދަހިފުން ފަދަ އަޅުކަންތަކަށް ހަޖޫޖަހައެވެ. މި ފިކުރު ޒުވާނުންނާ ހަމައަށް ގެނެސްދޭ މެދުވެރިއަކީ ފަންނިއްޔާތުގެ އެކިއެކި ވަޞީލަތްތަކެވެ. އެހެންކަމުން ޒުވާނުންގެ ޢަޤީދާ ބަލިކަށިވުމަކީ، ފަންނިއްޔާތު ބޭނުންކުރެވޭ ގޮތުގެ ސަބަބުން، އެބައިމީހުންނަށް ލިބެމުންއަންނަ ވަރަށް ބޮޑު ގެއްލުމެކެވެ.
ލިބިފައިވާ އަގުހުރި ވަގުތުކޮޅު ބޭކާރުގޮތުގައި ބީވެ ދިޔުމަކީ ވެސް، ފަންނިޔާތުގެ ބޭނުން ހިފޭ ގޮތުގެ ސަބަބުން މިއަދު ޒުވާނުންނަށް ކުރަންޖެހޭ ވަރަށް ހިތްދަތި ތަޖުރިބާއެކެވެ. ޝައްކެއްނެތް ގޮތުގައި ވަގުތަކީ ވަރަށް އަގު ބޮޑު ނިޢުމަތެކެވެ. އެ ނިޢުމަތަކަށް އިންސާނާ ވަރަށް ބޮޑަށް ޣާފިލުވެފައިވާ ނިޢުމަތެއް ވެސް މެއެވެ. ދުނިޔަވީ ހަޔާތުގައި ލިބިފައިވަނީ ކިހައި ކުޑަކުޑަ ވަގުތުކޮޅެއްކަމާ މެދު ގިނަ މީހުންނަށް ވިސްނައެއް ނުލެވެއެވެ. މިހެން މިކަން އޮއްވާ، ފަންނިއްޔާތުގެ ދަންތުރައިގައި ޖެހި އިންސާނާ ހައްޔަރުވެއްޖެއެވެ. އެއާއެކު ވަގުތު އިސްރާފުކުރުން މި ވަނީ ހައްދުން ނެއްޓިފައެވެ. މި ކަމުގައި އެންމެ ކުރީ ސަފުން ޖާގަ ކަށަވަރުކުރީ ޒުވާނުންނެވެ. ދުނިޔެއާއި އާޚިރަތަށް ޓަކައި ކުރާން ހުރި އެތައް ކަމެއް ދޫކޮށްލާފައި، ފަންނިއްޔާތުގެ އެކިއެކި ވަސީލަތްތަކުގެ އަޅުންނަށްވެ ތިބެ، ވަގުތުތައް ބަރުބާދުކުރަމުން ގެންދަނީ، ޚިޔާލެއް ފިކުރެއް ނެތިއެވެ. ތަފާތު ނަންނަމުގައި އުފައްދާފައި ހުރި ސީރީޒްތަކާއި ފިލްމުތައް ބެލުމުގައެވެ. އަތުން ދޫކޮށްނުލެވޭ ފަދަ ގޭމްތައް ކުޅުމުގައެވެ. އިންޓަނެޓުގެ އެކިއެކި ވެބްސައިޓްތަކާއި އޮޅިތައް ހޭވުމުގައެވެ. ދީނީ ވާޖިބުތަކާއި ވަޒީފާގެ މަސްއޫލިއްޔަތުތަކާއި ދިރިއުޅުމުގެ ޒިންމާތަކަށް ލޯ މަރާލައިގެން ތިބެއެވެ. އެހެންކަމުން ލިބިފައިވާ އަގުހުރި ވަގުތުތައް ބޭކާރުވެ ދިޔުމަކީ، ފަންނިއްޔާތުގެ ސަބަބުން ޒުވާނުންނަށް ލިބެމުން އަންނަ ކޮން ފަދަ ބޮޑު ގެއްލުމެއްތޯއެވެ.
ބުއްދި ސަލާމަތުން ހުރި އެއްވެސް އިންސާނަކު، އޭނާގެ އަބުރު ފައިދަށުވާކަށް، ކުދިކުދިވެ، ޗިސްޗިސްވާކަށް ނޭދޭނެއެވެ. އެހެންނަމަވެސް ފަންނިއްޔާތުގެ މޫތައް މުޖުތަމައުގެ ހަ ފަރާތަށް ފެތުރި، ޒުވާނުން ހުވަފެނީ އާލަމެއްގައި ބައިތިއްބައިގެން، އެބައިމީހުންގެ އަބުރު ކަތިލަމުން ދާކަމީ ގަބޫލުކުރަންޖެހޭ ޙަޤީޤަތެކެވެ. މިއީ ފަންނިއްޔާތުގެ އެއް ބަހާ ކަމަށްވާ، މީސްމީޑިޔާގެ ބާރުގަދަ ވިއުގައިގެ ތެރޭގައި، ހިންގަމުން އަންނަ ވަރަށް ބޮޑު ޖަރީމާއެކެވެ. ވިސްނައި ނުލައި ހުރެ ފަންނިއްޔާތުގެ ދުނިޔޭގައި އެޅޭ ކަތި ފިޔަވަޅެއްގެ ސަބަބުން، ފަޟީޙަތްވީ ކިތައްކިތައް ޒުވާނުން ހެއްޔެވެ؟ އަނެކާގެ އަގު ވައްޓާލުމުގެ ގަސްދުގައި ހަގީގަތެއް ނެތް ވާހަކަތައް ފަތުރަނީ ކިތައް ޒުވާނުން ހެއްޔެވެ؟ ދާދިމިދާކަށް ދުވަހު ކިޔަވާކުއްޖެއްގެ އަބުރު، ބަޔަކު މީހުން ކަތިލައި އަޅައިލި އަޅައިލުމަކީ، މި ކަމުގެ ވަރަށް ސާފު ހެތްކެކެވެ. މީސްމީޑިޔާގައި ފެތުރި ދޮގު ވާހަކަތަކެއްގެ ސަބަބުން، އެ ކުއްޖާ ކިޔެވުމުން މަޙުރޫމުވެ، މުޖުތަމައުގައި ފަޟީޙަތްވިއެވެ. ބޮޑު ގިލަންވެރިކަމެއްގެ ތެރެއަށް މުޅި ޢާއިލާ ފެތުނެވެ. މި ފަދަ އެތައްއެތައް ހާދިސާއެއް މި މުޖުތަމަޢުގައި ހިނގައެވެ. އެހެންކަމުން ފަންނިއްޔާތުގެ ބޭނުންކުރެވޭ ގޮތުގެ ސަބަބުން، އަބުރު ގެއްލި ފަޟީޙަތްވަމުން ދިޔުމަކީ، އެކަމުގެ ސަބަބުން އަދުގެ ޒުވާނުންނަށް ލިބެމުން އަންނަ ނުހަނު ބޮޑު ގެއްލުމެކެވެ.
ފަންނިއްޔާތުގެ މަދަދާއެކު އުފައްދާފައި ހުރި، މުނިފޫހި ފިލުވުމުގެ ގިނަ ބާވަތްތަކަކީ ޒުވާނުންގެ ހަރަކާތްތެރިކަމަށް ހުރަސްއަޅާފައިވާ ބާވަތްތަކެކެވެ. މި ފަދަ ބާވަތްތައް ދުނިޔެއަށް ނޭވާލުމާއެކު، މި ތަކެތީގެ އަވާގައި އެތައް ޒުވާނުންނެއް ވަނީ ޖެހި ހަފުސްވެފައެވެ. އެ ފަދަ ތަކެތީގެ ބައިވެރިއެއްގެ ގޮތުގައި ރެއާއި ދުވާލުގެ އެތައް ވަގުތެއް ހޭދަކުރެއެވެ. ތަފާތު ނަންނަމުގައި އުފައްދާފައި ހުންނަ ފިލްމުތަކާއި ސީރީޒްތަކާއި ގޭމްތަކުގެ އިތުރުން، މީސްމީޑިޔާގެ އެކިއެކި މަންސަތަކުގެ ޖާދޫގައިޖެހި ހައްޔަރުވެ ތިބެއެވެ. ގެއްލެމުންދާ ސިއްހީ ދުޅަހެޔޮކަމަށް ފަރުވާލެއް ނެތިއެވެ. ނަތީޖާއަކީ ޞިއްޙީ ބަލިމަޑުކަމެއްގެ ޝިކާރައަކަށް ޒުވާން ޖީލު ވުމެވެ. ނޫކަށި އުމުރުގައި ބަލި ދާނުގައި އޮންނާން ޖެހުމެވެ. ލޭމައްޗަށް ދިޔުމާއި ހަކުރުބައްޔާއި ކޮލެސްޓްރޯލް މަތިވުން ފަދަ ކަންކަމުގެ އިތުރުން، ލޮލުގެ ބަލިތަކާއި ފަލަ ބައްޔާ ހަނގުރާމަކުރަމުން ދާ ޒުވާނުންގެ އަދަދު މިއަދު ވަނީ އިންތިހާއަށް އަރާފައެވެ. އެހެންކަމުން ފަންނިއްޔާތުގެ ސަބަބުން ހެލިފެލިވެ އުޅުމަށް ހުރަސްއެޅި، ތަފާތު ބަލިމަޑުކަމާ ކުރިމަތިލާން ޖެހުމަކީ، ޒުވާނުންނަށް ލިބެމުން އަންނަ ވަރަށް ބޮޑު ގެއްލުމެކެވެ.
ކާބަފައިންގެ ދުވަސްވަރުގެ ދިވެހި ޒުވާނުންނަކީ، ރިވެތި އާދަތަކަކަށް ތަބާވެގެން އުޅުނު، ގޮތްފޮތް ހުރި ބަޔެކެވެ. އެ ޒަމާނުގެ ވާހަކަތަކާއި ދިވެހިންގެ ތާރީޚީ ފޮތްތަކުން މި ކަން ފެންނާން އެބަ ހުއްޓެވެ. އެހެންނަމަވެސް މިއަދުގެ ގިނަ ޒުވާނުންގެ ކިބައިން އެ ފަދަ ރީތި ސިފަތަކެއް ނުފެނެއެވެ. އޭގެ ބަދަލުގައި ފެންނަނީ، އަދަބު އަޚުލާޤުގެ ކުލައެއް ރަހައެއް ޖެހިފައި ނެތް ޒުވާނުންތަކެކެވެ. މަގުމަތީގެ އަދަބުތަކަށް އިހުތިރާމް ކުރުމެއް ނޯވެއެވެ. މައިންބަފައިންނަށާއި އުމުރުން ދުވަސްވީ މީހުންނަށް ޤަދަރުކުރުމެއް ނޯވެއެވެ. ކުށްތަކަށް އަރައިގަތުން ވަނީ ޒަމާނީ ކަމަކަށް ހަދާފައެވެ. މި ޖީލުގެ ޒުވާނުނަށް މި ފަދަ ބަދަލުތަކެއް އައިސްފައި މި ވަނީ ކީއްވެގެންތޯއެވެ؟ ޝައްކެއް ނެތް ގޮތުގައި، މި ކަންކަމުގެ އެންމެ ބޮޑު ސަބަބަކީ، ހުޅަނގުގެ މީހުންގެ ކިބައިގައި ހުރި ބޭއަދަބީ އުޅުމާއި ބަސްމަގު، އަޅުގަނޑުމެންގެ ސިޓިންރޫމުތަކާއި ކޮޓަރިތަކާ ހަމައަށް އައިސްފައި ވާތީއެވެ. ފާރުތަކާއި ފަންގިފިލާތަކުގައި ބިންވަޅުނެގިފައި ވާތީއެވެ. ނަތީޖާއެއްގެ ގޮތުން އެ އުޅުމާއި ބަސްމަގު ޒުވާނުންނަށް ކަމުގޮސް، އެ ގޮތަށް އުޅެންފެށީއެވެ. އެހެންކަމުން ފަންނިއްޔާތުގެ ސަބަބުން ޒުވާނުންގެ ކިބައިގައި ނޭދެވޭ ސިފަތައް އަށަގަތުމަކީ ވެސް، އެބައިމީހުންނަށް ލިބެމުން އަންނަ ނުހަނު ބޮޑު ހިތާމައެކެވެ.
ޝައްކެއްނެތެވެ! ފަންނިއްޔާތުގެ ބޭނުންކުރެވޭ ގޮތުގެ ސަބަބުން އަދުގެ ޒުވާނުންނަށް ގިނަގުނަ ގެއްލުންތަކެއް ދަނީ ލިބެމުންނެވެ. އޭގެތެރޭގައި، އެބައިމީހުންގެ ހިތުގައި ބިންވަޅުނެގިފައިވާ އިސްލާމީ ޢަޤީދާގެ ބިނާ، ރޫޅި ފުނޑުފުނޑުވުމުގެ ބިރާ ކުރިމަތިވެއެވެ. ލިބިފައިވާ އަގުހުރި ވަގުތުތައް އޮޔަށް ވަޔަށް ބުރައިގެންދިޔުމުގެ ކަންބޮޑުވުން އިހުސާސްކުރާން ޖެހެއެވެ. ޣާފިލުކަމުގެ ނިދީގައި ތިއްބާ އަބުރާއި ޢިއްޒަތް ވެއްޔާ މޮޑެވިގެންދިޔުމުގެ ހިތާމަ ވަށާލައެވެ. އެންމެ އަގުބޮޑު އެއް ނިޢުމަތްކަމަށްވާ ދުޅަހެޔޮކަން ހަށިން ބީވެދިޔުމުގެ ބަދުނަސީބު ހާލަތް ތަޖުރިބާކުރާން ޖެހެއެވެ. ނޭދެވޭ ސިފަތަކުން ނަފުސު ކަޅިވެ، އޭގެ ހިތި ރަހަ އަރުގައި ހިފައެވެ. އެހެންކަމުން އެ އެއްޗެއްގެ މައްޗަށް މުޅި ދުނިޔެ މިއަދު ބަރޯސާވެފައިވާ ފަންނިއްޔާތު ބޭނުންކުރާ އިރު، ފައިދާހުރި ގޮތުގައި ބޭނުން ހިފުމަށް، ކޮންމެ ޒުވާނަކު ވެސް ސަމާލުކަން ދެމާތޯއެވެ!
Be the first to comment