އޮޓޯބައޮގަރްފީ

ކުރެހުމުގެ ފަންނުގައި އަޅުގަނޑު

ހޭލައިގަތީއްސުރެ ކުރެހުމުގެ ދާއިރާއަށް ޝައުޤުވެރިކަން ހުންނަ އަޅުގަނޑު (މާހިރު އަލީ، ފުސްވިލާގެ / ލ. ފޮނަދޫ) އަކީ، ލ. ފޮނަދޫ ފުސްވިލާގޭ އަލީ ނާފިޒާއި، ހަމަ އެ ރަށު ކުދިބަތްގޭ ރުޤިއްޔާ ޙަސަނަށް ލިބުނު ހަމައެކަނި ދަރިފުޅެވެ. 1980 ވަނަ އަހަރު މޭމަހު 19 ވަނަ ދުވަހު ދުނިޔެއަށް އުފަންވެފައިވާ އަޅުގަނޑަކީ، އަޅުގަނޑުގެ މައިންބަފައިންނާއި އާއިލާގެ މީހުން ބުނާ ގޮތުގައި، އުފެއްދުންތެރި ވިސްނުމެއް ހުންނަ، ސަކަ މިޒާޖެއްގެ މީހެކެވެ.

ރަށު މަދަރުސާގެ ގުރޭޑް 1 އަށް އަޅުގަނޑު ވަނީ އުމުރުން 6 އަހަރުގައެވެ. އަޅުގަނޑުގެ ބައްޕައަކީ އަމިއްލަ ޝައުޤެއްގެ ގޮތުގައި ކުރެހުމުގެ މަސައްކަތްކުރާ މީހެއްކަމުން، ހަޔާތުގެ އެންމެ ތުއްތު އުމުރުން ފެށިގެން ވެސް، އަޅުގަނޑުގެ ކުރިމަތީގައި ސިފަވަމުން ދިޔައީ، ބައްޕަ ކުރަހާފައި ހުންނަ ރީތި ކުރެހުންތަކުން ގޭގެ ފެންޑާތެރެ ޒީނަތްތެރިކޮށްފައިވާ ތަނެވެ. އެހެންކަމުން ކުރެހުމާއި ކުލަޖެއްސުމުގެ މަސައްކަތަށް އަޅުގަނޑުގެ ހިތުގައި އުފެދުނު ޝައުޤުވެރިކަމާ އެކު، އުމުރުން 7 އަހަރުގައި ބައްޕަގެ ފިޔަވަޅުމަތީގައި ފިޔަވަޅުއެޅޭތޯ މަސައްކަތްފެށީމެވެ.

ގްރޭޑް 10 އާ ހަމައަށް ކިޔަވައި 1996 ވަނަ އަހަރު، އަޅުގަނޑު އޯލެވެލް ނިންމާލީ، އެއްވެސް ގްރޭޑެއްގައި ދެ އަހަރު އުޅުމުގެ ބުރަ ނޫފުލައެވެ. ކޮންމެ ޓާމެއްގައި ވެސް ރިޕޯޓްފޯމް ހިފައިގެން އަޅުގަނޑު ގެއަށް އަންނަނީ، ފަޚުރުވެރި އަތަކުންނެވެ. އެއިން ކޮންމެ ފަހަރަކީ، މަންމައާއި ބައްޕަގެ ދެ ލޮލުން އުފާވެރިކަމުގެ ވިދުވަރު ފެނިގެންދާ ފަހަރެކެވެ. މީގެއިތުރުން ސްކޫލް ފެންވަރުގައި ބޭއްވި ކުރެހުމުގެ އެކިއެކި މުބާރާތްކުގައި، އަޅުގަނޑު ހޯދި ފަޚުރުވެރި ކާމިޔާބުތަކުން މަންމައާއި ބައްޕަގެ ހިތް އުފާކޮށްދިނީމެވެ.

އޯލެވެލްގައި ލިބުނު ކާމިޔާބާ އެކު، ކުރެހުމުގެ ދާއިރާއިން ލިބުނު 3 އަހަރުދުވަހުގެ ކޯހެއްގައި 1998 ވަނަ އަހަރު އަޅުގަނޑު މެޑްރާހަށް ފުރީ، ކުރެހުމުގެ ފަންނުން މޮޅު މީހަކަށްވުމުގެ މަތިވެރި އަޒުމުގައެވެ. 2001 ވަނަ އަހަރު އެނބުރި ރާއްޖެއަށް އައީ، ކުރެހުމާއި ފަރުމާކުރުކުގެ ދާއިރާއިން ފުރަތަމަ ޑިގްރީ ހާސިލް ކޮށްގެންނެވެ. އަދި އަޅުގަނޑުގެ ފިހިން ކުރެހުމުގެ ދިވެހި ޖައްވުގައި ރަންކުލަ ޖެއްސުމުގެ މަތިވެރި އަޒުމާ އެކުގައެވެ.

މި އުފާވެރި އަހަރު ވެގެންދިޔައީ، އަޅުގަނޑުގެ ހަޔާތަށް އައި، އެންމެ ހިތާމަވެރި އަހަރަށް ވެސް މެއެވެ. ވަރަށް ކުއްލި ގޮތަކަށް އަޅުގަނޑުގެ ބައްޕަ މި ދުނިޔެ ދޫކުރުމުގެ ސަބަބުންނެވެ. އެހެންކަމުން ހަމަ އެ އަހަރު މަންމަ ގޮވައިގެން އަޅުގަނޑު މާލެއަށް ބަދަލުވީމެވެ.

2005 ވަނަ އަހަރު ޖަނަވަރީމަހު މާލޭގައި “ފައިން އާޓްސް ގެލެރީ”ގެ ނަމުގައި ފަތުރުވެރިކަމަށް ޚާއްޞަކޮށް، އިސްޓޫޑިއޯއެއް ހުޅުވައިގެން ކުރެހުމުގެ މަސައްކަތް އަޅުގަނޑު ފެށީ، ވަރަށް ބޮޑު އުއްމީދަކާ އެކުގައެވެ. ކުޑަ ދުވަސްކޮޅެއްގެ ތެރޭގައި މުޅި ފަތުރުވެރިކަމުގެ ސިނާޢަތަށް އަޅުގަނޑުގެ އިސްޓޫޑިއޯގެ އަލިކަން، އޭގެ އެންމެ މަތިވެރި ދަރަޖައަށް ފޯރައި، އެތައް ބަޔެއްގެ ޝައުޤުވެރިކަމުގެ ކަޅި، އަޅުގަނޑުގެ މަސައްކަތަށް ހުއްޓުނެވެ. ނަތީޖާއަކަށް ވެގެން ދިޔައީ، ރާއްޖޭގެ އެތައް ރިސޯޓަކުން މަސައްކަތްތައް ލިބެންފެށުމެވެ.

އަޅުގަނޑުގެ މަދސައްކަތް އެތައް ބަޔަކު ބަލައިގަތްކަމީ، މި މަސައްކަތުގައި ކުރިއަށް ދިޔުމަށް އަޅުގަނޑަށް ލިބުނު ވަރަށް ބޮޑު ހިތްވަރެކެވެ. އެ ހިތްވަރުގައި ކުރެވުނު މިންނެތް މަސައްކަތުގެ ނަތީޖާއެއްގެ ގޮތުން، 2010 ވަނަ  އަހަރު އަޅުގަނޑުގެ މަސައްކަތް ވަނީ، ރާއްޖޭގެ ހިކިފަސް ތަންތަނާއި ކަނޑުއޮޅިތައް ގިރާކޮށް، ބޭރުގެ ކަރަތަކަށާއި ވިލާތްތަކަށް ޒިޔާރަތްކުރަން ފަށާފައެވެ. މަސައްކަތުގައި އިތުރު އަތްތަކެއް ޝާމިލުކޮށްފައެވެ

އަޅުގަނޑުގެ ކުރެހުމުގެ މަސައްކަތުގެ އަގު ވަޒަންކޮށް، 2012 ވަނަ އަހަރުގެ ޒުވާނުންގެ ދުވަހު، ދިވެހި ސަރުކާރުން އަޅުގަނޑަށް ދެއްވި ޒުވާނުގެ އިނާމަކީ، މަސައްކަތް އިތުރަށް ފުޅާކުރަން އަޅުގަނޑަށް ލިބުނު ވަރަށް ބޮޑު ހިތްވަރެކެވެ.

2007 ވަނައަހަރު ފެބުރުވަރީމަހު، މ. ނަލަވިލާ ޝަފީނާ އިސްމާޢީލާ އެކު، ޒަވާޖީ ހަޔާތެއް ފަށައި، މިހާރު 2 ފިރިހެން ކުދިން އަޅުގަނޑަށް ވަނީ ލިބިފައެވެ. މިއަދު ވެސް މި މަސައްކަތުގައި ވަރުބަލިކަމެއް، ފޫހިކަމެއް ނެތި ހަރަކާތްތެރިކަމުން އަންނައިރު، އަޅުގަނޑުގެ އެންމެ ބޮޑު ހުވަފެނަކީ، ބޮޑެތިވަމުން އަންނަ އަޅުގަނޑުގެ ދެ ކުދިން މި މަސައްކަތުގައި ހިފާނެ ދުވަހެކެވެ. އިރާދަކުރެއްވިއްޔާ އެ ދުވަސް ވަރަށް އަވަހަށް ފެންނާނެއެވެ.