ކޮންމެ ބަހަކުން ވިޔަސް، ރަނގަޅަށް މުޢާމަލާތްކުރާން އެނގޭނީ، އެ ބަހުގެ ހަމަތަކަށް ލޯ ހުޅުވިގެންނެވެ. ހަމައާއި ޤަވާއިދު ދަސްވެގެންނެވެ. އެ ކަމަށް އޮތް ހައްލަކީ، ބަހުގެ ހަމަތައް ދަސްކުރުމެވެ. ބައެއް މީހުން ބުނެފާނެއެވެ. ހަމައާއި ގަވާއިދަކީ އެހައި މުހިންމު އެއްޗެއް ނޫނެވެ. ބުނާ އެއްޗެއް ދޭހަވުމުން ފުދޭނެއެވެ. ނޫނެކެވެ. އެ ވަރަކުން ނުފުދޭނެއެވެ. ލިޔެކިޔުމާއި ވާހަކަ ދެއްކުމުގައި ބަހުގެ ގަވާއިދާއި ހަމައާ ޚިލާފުވާ ނަމަ، ތިމާގެ ޢިލްމީ ފެންވަރާ މެދު، ދަންނަ މީހުން ސުވާލު އުފައްދާނެއެވެ.
ވާފިރު ރަށަށް ގޮސްފައި އަނބުރާ އަތުވެއްޖެއެވެ.
މޯލްޑިވިއަންގެ މަތިންދާބޯޓެއް އައްޑުއަށް ގޮސްފައި އެނބުރި އަތުވެއްޖެއެވެ.
މަތީގައި އޮތް ދެ ޖުމުލައާ މެދު ބުނަނީ ކީކޭ ހެއްޔެވެ؟ ބަހުގެ ހަމައަށް ބަލާއިރު، އެއްވެސް މައްސަލައެއް އެބަ އޮތް ހެއްޔެވެ؟ އާއެކެވެ. އެބަ އޮތެވެ. އެ ދެ ޖުމުލައިގައި “އަނބުރާ” އާއި “އެނބުރި” ބޭނުންކުރެވިފައި އެ އޮތީ، މުޅީން ރަނގަޅަކަށް ނޫނެވެ. ބަހުގެ ހަމައާ ޚިލާފަށެވެ. އެހެންނަމަވެސް މިއީ ވަރަށް ގިނައިން ލިޔެފައި ހުއްޓާ ފެންނަ ގޮތެކެވެ. އެހެންކަމުން މިހައި ހިސާބުން އެ ލަފުޒު ބޭނުންކޮށް އުޅޭ ހަމައަށް ބަލައިލަމާ ހިނގާށެވެ!
ފުރަތަމަ ބަލައިލާނީ “އެނބުރި” މި ލަފުޒަށެވެ. ބަހުގެ ހަމައިގައި ބުނާ ގޮތުން “އެނބުރި” މި ލަފުޒު ބޭނުންކުރެވެނީ، މީހުންނާ ގުޅުވައިގެންނެވެ. މި ތަނުގައި މީހުން މާނަކުރަނީ އިންސާނުންނަށެވެ. ކުޑަކުދިންނާއި ބޮޑެތި މީހުން ވެސް ހިމެނޭ ގޮތަށެވެ. އެހެންކަމުން އެނބުރި އަންނާނީ، އަދި އެނބުރި ދާނީ ވެސް އިންސާނުންނެވެ. އިންސާނަކު އަނބުރައެއް ނާންނާނެއެވެ.
މަންމަ އަނބުރާ ގެއަށް އަތުވެއްޖެއެވެ.
ފަޒީލު އަނބުރާ ރަށަށް ހިނގައްޖެއެވެ.
މި ފަދަ ގޮތްގޮތަށް ލިޔެފައި ހުންނަތަން ބައެއް ފަހަރު ފެނެއެވެ. ބަހުގެ ހަމަ ބުނެދޭ ގޮތުގައި މިއީ ރަނގަޅު ގޮތެއް ނޫނެވެ. އޭގެ ބަދަލުގައި ލިޔަންވާނީ ތިރީގައި މިވާ ގޮތަށެވެ.
މަންމަ އެނބުރި ގެއަށް އަތުވެއްޖެއެވެ.
ފަޒީލު އެނބުރި ރަށަށް ހިނގައްޖެއެވެ.
ސަބަބަކީ މަންމައަކީ ވެސް އަދި ފަޒީލަކީ ވެސް އިންސާނުން ކަމަށްވެފައި، އިންސާނުންނަށް ނިސްބަތްކޮށް އަނބުރާ އައުން ނުވަތަ އަނބުރާ ދިޔުން ބޭނުން ނުކުރެވޭނެތީއެވެ.
ދެން އޮތީ “އަނބުރާ” މި ލަފުޒެވެ. ބަހުގެ ހަމަ ކިޔައިދޭ ގޮތުން، މި ލަފުޒު ބޭނުންކުރާން ވާނީ ދަތުރުކުރާ އެއްޗިއްސާ ގުޅުވައިގެންނެވެ. މާނައަކީ ދަތުރުފަތުރުކުރާ އުޅަނދުފަހަރާ ގުޅުވައިގެންނެވެ. އެއްގަމުގައި ވިޔަސް، ކަނޑުގައި ވިޔަސް، އަދި ވައިގައި ވިޔަސް، ދަތުރުކުރާ އުޅަނދެއް ނަމަ، އެ އުޅަނދެއް އަންނާނީ، އަދި ދާނީ ވެސް އަނބުރައެވެ. އެހެންނަމަވެސް މި ހަމައާ ޚިލާފަށް ވެސް ލިޔެފައި ހުރެއެވެ.
ދެންމެ މި ގެއަށް އައި ޓެކްސީ އެނބުރި ހިނގައްޖެއެވެ.
ފެނޭބާ ދޯނި އެނބުރި ރަށަށް އަތުވެއްޖެއެވެ.
މި ދެ ޖުމުލައަކީ ވެސް، ބަހުގެ ހަމައާ ޚިލާފަށް ލިޔެފައިވާ ދެ ޖުމުލަކަން މިހާރު އެބަ އެނގެއެވެ. ސަބަބަކީ އެއްވެސް ބާވަތެއްގެ އުޅަނދެއް އެނބުރިއެއް ނާންނާނެއެވެ. އަންނާނީ އަނބުރައެވެ. އެހެންކަމުން މި ދެ ޖުމުލަ ލިޔެފައި އޮންނާނީ ވާނީ،
ދެންމެ މި ގެއަށް އައި ޓެކްސީ އަނބުރާ ހިނގައްޖެއެވެ.
ފެނޭބާ ދޯނި އަނބުރާ ރަށަށް އަތުވެއްޖެއެވެ. މި ގޮތަށެވެ.
މިހައި ހިސާބުން އިތުރު ސުވާލެއް އުފެދިއްޖެއެވެ. ފެނޭބާ ދޯނީގައި ހަލީމާ ރަށަށް އަންނާނީ އަނބުރާ ހެއްޔެވެ؟ ނުވަތަ އެނބުރި ހެއްޔެވެ؟ މި ޖުމުލައިގައި، އުޅަނދެއް ވެސް އަދި މީހެއް ވެސް އެބަ ހިމެނެއެވެ. އެހެންކަމުން އެ ޖުމުލައަށް ގެންނާނީ، “އަނބުރާ، އެނބުރި” މި ދެ ލަފުޒުން ކުރެ ކޮން ލަފުޒެއް ހެއްޔެވެ؟ ޖުމުލައަށް ފުންކޮށް ވިސްނައިލަމާ ހިނގާށެވެ. މި ޖުމުލައިގައި ބުނާ ގޮތުން “އައުން” ނިސްބަތް ވަނީ ފެނޭބާ ދޯންޏަށް ހެއްޔެވެ؟ ނޫނީ ހަލީމާއަށް ހެއްޔެވެ؟ ޖަވާބަކީ ހަލީމާއަށެވެ. ފެނޭބާ ދޯންޏަކަށް ނޫނެވެ. ހަލީމާއަކީ އިންސާނެކެވެ. އިންސާނުންނަށް ނިސްބަތްކުރަނީ “އެނބުރި” އެވެ. އެހެންކަމުން އެ ޖުމުލަ އޮންނާންވާނީ “ފެނޭބާ ދޯނީގައި ހަލީމާ އެނބުރި ރަށަށް އަތުވެއްޖެއެވެ.” މި ގޮތަށެވެ.
މި ފަހަރު އެހެން ސުވާލެކެވެ. ހަލީމާ ދަތުރުކުރި ފްލައިޓް ދިވެހިރާއްޖެއަށް އަންނާނީ އަނބުރާ ހެއްޔެވެ؟ ނުވަތަ އެނބުރި ހެއްޔެވެ؟ މި ޖުމުލައިގައި ވެސް އުޅަނދަކާއި އިންސާނަކު އެބަ ހިމެނެއެވެ. މި ފަހަރު ވެސް ވިސްނާނީ ކުރީން ވެސް ވިސްނި ފަދައިން “އައުން” ނިސްބަތްވީ އުޅަނދަށްތޯ ނުވަތަ އިންސާނާއަށްތޯއެވެ. ޖަވާބަކީ އުޅަނދަށެވެ. ނުވަތަ ހަލީމާ ދަތުރުކުރި ފްލައިޓެވެ. ހަލީމާއަކަށް ނޫނެވެ. އެހެންކަމުން މި ޖުމުލައިގައި ބޭނުންކުރަންވާނީ އުޅަނދުފަހަރާ ގުޅުވައިގެން ބޭނުންކުރާ ލަފުޒުކަމަށްވާ، “އަނބުރާ” އެވެ. އެހެންކަމުން މި ޖުމުލަ އޮންނާންވާނީ “ހަލީމާ ދަތުރުކުރި ފްލައިޓް އަނބުރާ އަތުވެއްޖެއެވެ.” މި ގޮތަށެވެ.
ދެން އުފެދޭ ސުވާލަކީ ދޫނިސޫފާސޫތްޕާއި ޖަނަވާރު ފަދަ ތަކެއްޗަށް ބޭނުންކުރާނީ، މި ތަނުން ކޮން ލަފުޒެއް ހެއްޔެވެ؟ އަނބުރާ” ހެއްޔެވެ؟ ނޫނީ “އެނބުރި” ހެއްޔެވެ؟ މިއީ ވެސް މި މައުޟޫޢުގައި ވާހަކަ ދައްކާލަން ޖެހޭ ބަޔެކެވެ. ގަސްތުކުރަނީ، އެހެން ލިޔުމެއްގައި، މި ބަޔަށް އަލި އަޅުވައިލާށެވެ.
މި ލިޔުމުން އެނގުނީ އެނބުރި އައުމާއި އެނބުރި ދިޔުން ބޭނުންކުރާނީ، އިންސާނުންނަށް ނިސްބަތްކޮށްކަމެވެ. އަދި އަނބުރާ އައުމާއި އަނބުރާ ދިޔުން ބޭނުންކުރާނީ، ދުއްވާ އުޅަނދުފަހަރަށް ނިސްބަތްކޮށްކަމެވެ. އެހެންކަމުން ބަހުގެ ހަމައާ ޚިލާފަށް މި ދެ ލަފުޒު ބޭނުންކުރެވޭ ނަމަ، ކުރިއަށް އޮތް ތަނުގައި އެ ކަން އިސްލާޙުކޮށްލާށެވެ!
Be the first to comment