ޅެމަށް ފާޑުކިޔުން.

ލިޔުނީ: މުހައްމަދު ގާސިމް

1- ޅެމުގެ އެތެރެފުށުގެ ރީތިކަން:

• ޅެމުގެ މައިގަނޑު ޚިޔާލު ފާޅުކޮށްފައިވަނީ ކޮންކަމަކަށްކަން
• ކޮންމެ ބައިތެއްގައި ބުނާ ވާހަކަ ކުރުކޮށް
• ހިޔާލުގެ މުއްސަނދިކަން ( ކޮން ބާވަތެއްގެ ޚިޔާލެއްކަން )
• ހުށައަޅަދީފައިވާއުސްލޫބުން (ޅެން ހުށައަޅާފައިވާ ސްޓައިލް ނުވަތަ ގޮތް)
• ބަސްކޮށާރު (ހާލަތާ މުނާސަބުތޯއާއި މުއްސަނދި ބަސްކޮށާރެއްތޯ)
• ޖަޒުބާތާ ޝުއޫރު (ފުނަށް އަސަރު ފޯރުވާފަދަ ގޮތެއް ހުރިތޯ ުވަތަ ނޫންތޯ)
• ޅެމުގެ ނަމާ ފާޅުކޮށްފައިވާ ޚިޔާލާ ގުޅޭތޯ

2- ޅެމުގެ ބޭރުފުށުގެ ރީތިކަން:

• ފިލިކޯޅި
• ބަނޑުވައްއަކުރު
• ކާފިޔާ
• ވަޒަން

3- އެމުނިއެކުލެވުން

• ޅެން ކިޔާ ރާގުގައި ކިޔައިލާއިރު، އަޅައިގަތުމެއް ކޮރުކަމެއް ނެތި ކިޔައިލެވޭތޯބެލުން
• ބައިތުތަކުގައި ލަފުޒުތައް އަތުރާފައިވާ ގޮތާއި އެއް ބައިތު އަނެއްބައިތާ މާނައިގެ ގޮތުން ގުޅުވާފައިވާ މިންވަރު

ޖުމްލަ ގޮތެއްގައި ޅެމާމެދު ދެކޭގޮތް.

ޅެމަށް ފާޑުކިޔުން.
ގައުމީ ގޮވައިލުމެއް
އިންސާނަކަށް އުފަންވުމުން އިންސާފުގައި ހިފަން ޖެހޭ
ވިންދާ ފުރާނަ ހުރިކަމުން ހިންމަތް އިތުރު ކުރަން ޖެހޭ
ދީނާ ތިމާގެ މިއްލަތަށް ރައްކާތެރިވެ އުޅެންޖެހޭ
ފީނާ ތިމާގެ ބުންވަރުން ޢިލްމީ ކަނޑަށް ފެތެން ޖެހޭ
އެކަމުން ފުރާގު ލިބެވިދާ ކަމަކަށް ސަމާލުވާން ޖެހޭ
އެކަމުގެ ތެރޭ ތިމާގެ ހުރި ތެދުވެރިކަމެއް އެނގެން ޖެހޭ
ފަސްވަގުތު މޫނު ބިންމަތީ ޖައްސައި ހަނދާން ކުރަންޖެހޭ
ކަސްތަޅުތަކުން ދިނޭނެ ގޮތް ގަސްތުންމެ ހުރެ ހަދަން ޖެހޭ

އެތެރެފުށުގެ ރީތިކަން
“ގައުމީ ގޮވައިލެމެއް” މިޅެމުގެ މައިގަނޑު ޚިޔާލު ޅެންވެރިޔާ ބިނާކުރައްވާފައިވަނީ ދުނިޔޭގައި އުޅޭއިރު އިންސާނުން ސަމާލުކަން ދޭނެޖެހޭ އެކިއެކި ކަންކަމުގެ މައްޗަށެވެ. އެގޮތުން ޅެންވެރިޔާ ވިދާޅުވަނީ، އިންސާނަކަށްވީތީ، އިންސާފުގައި ހިފަން ޖެހޭނެކަމަށާއި، ފުރާނަ ހުރިހައި ހިނދަކު ހިންމަތްކުރަން ޖެހޭނެ ކަމަށެވެ. ދީނަށާއި މިއްލަތަށް ރައްކާތެރިވެ، އިލްމު ހޯދަން މަސައްކަތް ކުރަން ޖެހޭނެކަމަށެވެ. ބަނޑުފުރާނަ މުއްތިކުރެވޭނެ ކަންކަމަށް ސަމާލުކަންދޭންޖެހޭނެ ކަމަށާއި، އެކަމުގައި ތެދުވެރިވާންޖެހޭނެ ކަމަށެވެ. އަދި ފަސްވަގުތު ނަމާދުކުރަން ހަނދާންކުރުމަށާއި އާޚިރަތުގެ ޢަޒާބުން ސަލާމަތްވާނެ ގޮތް ހަދަންޖެހޭނެކަމަށެވެ. މިވާހަކަތައް ބަޔާންކޮށް ޅެންވެރިޔާ ފާޅުކޮށްފައި މިވަނީ އާންމުޚިޔާލެކެވެ. އެހެންނަމަވެސް، “ފީނާ ތިމާގެ ބުންވަރުން ޢިލްމީ ކަނޑަށް ފެތެން ޖެހޭ، ފަސްވަގުތު މޫނު ބިންމަތީ ޖައްސައި” ފަދަ ފަށުއި ޢިބާރާތްތައް ބޭނުންކޮށްގެން އުސްލޫބު ތަފާތުކޮށްފައިވާތީ، ޅެމުގެ ޚިޔާލަށް އިތުރު ފުރިހަމަކަމެއް ވަނީ އައިސްފައެވެ. މި ޅެމުގައި ޅެންވެރިޔާ ބޭނުންކުރައަވާފައި ވަނީ ހާލަތާ މުނާސަބު، މުއްސަނދި ބަސްކޮށާރެކެވެ. އޭގެތެރޭގައި “މިއްލަތް، ކަސްތޮޅު، ބުންވަރު” ފަދަ ލަފުޒުތައް ފާހަގަކުރެވެއެވެ. މި ޅެމަކީ އާންމު ޚިޔާލެއްގެ މައްޗަށް ބިނާކޮށް ހަދާފައިވާ ޅެމެއް ނަމަވެސް، ޅެމުގެ އުސްލޫބު ތަފާތުވެފައި، މުއްސަނދި ބަސްކޮށާރެއް ބޭނުންކޮށްފައި ވާތީ، ކިޔުންތެރިންގެ ޖަޒުބާތާ ކުޅެލެވޭ ފަދަ ޅެމަކަށް މިޅެން ވާކަމަށް ގަބޫލުކުރެވެއެވެ. އަދިހަމަ އެހެންމެ ޅެމުގެ ނަމާއި ފާޅުކޮށްފައިވާ ޚިޔާލާ ގުޅޭކަންވެސް ފާހަގަކުރެވެ އެވެ.

ބޭރުފުށުގެ ރީތިކަން
ޅެމުގެ ބަނޑުވައްއަކުރު ގެނެސްފައި ހުރީ “ނ،ނ- ނ،ނ- ކ،ކ- ސ،ސ” މިގޮތަށެވެ. އެހެންކަމުން ހުރިހާ ބައިތެއްގެ ބަނޑުވައްއަކުރު ވަނީ އެއްގޮތް ކޮށްފައެވެ. ފިލިކޯޅި ގެނެސްފައި ހުރީ “އިން، ވިން- ދީނާ، ފީނާ- އެކަ، އެކަ- ފަސް، ކަސް” މިގޮތަށެވެ. އެހެންކަމުން ހުރިހާ ބައިތެއްގެ ފިލިކޯޅި ވެސް ހުރީ އެއްގޮތް ކޮށްފައެވެ. ކާފިޔާ ވަނީ “ހޭ” މިގޮތަށް ހުރިހާ ބައިތެއްގައި އެއްގޮތްކޮށްފައެވެ. އަދި ޅެމުގެ ހުރިހާ ބައިތެއްވެސް ވަނީ 26 ފިލީގެ ވަޒަނަށް ފުރިހަމައަށް ފައްތާފަ އެވެ.

އެމުނި އެކުލެވުން
މިޅެން، ޅެންކިޔާ ރާގުގައި ކިޔައިލާއިރު، އެއްވެސްކަހަލަ އަޅައިގަތުމެއް ކޮރުކަމެއް ނެތި ކިޔައިލެވޭކަން ފާހަގަކުރެވެއެވެ. އަދި ޅެމުގައި ލަފުޒުތައް އަތުރާފައި ވަނީ އެމުނި އެކުލެވި ބުގިސްވާ ގޮތަށެވެ. ހަމައެހެންމެ އެއްބައިތު އަނެއް ބައިތާ ވެސް ވަނީ ވަރަށް ރީތިކޮށް ގުޅުވައިލާފައެވެ.
އެހެންކަމުން ޖުމުލަކޮށް ބަލާއިރު، މިޅެމަކީ އެތެރެފުށުގެ ރީތިކަމާއި ބޭރުފުށުގެ ރީތިކަމާއި އެމުނި އެކުލެވުމަށް ބަލާއިރު ރަނގަޅު ޅެމެކެވެ.