ޤުރުއާން ކިޔަވައިދިނުމުގެ ފަންނުގައި…

ސުވާލު:
އދ. މަތަރެސްފުށީ ފެންފިޔާޒުގޭ މުޙައްމަދު އިމްރާނަކީ ޤުރުއާން ކިޔަވައިދިނުމުގެ ދާއިރާގައި ދިގު މުއްދަތެއްގައި މަސައްކަތްކުރި، އޭނާގެ ޚިދުމަތް އެ އަތޮޅުގެ އެތައް ބަޔަކަށް ފޯރުކޮށްދީފައިވާ މީހެކެވެ. އޭނާގެ މި ޚިދުމަތުގެ އަގު ވަޒަންކޮށް ސަރުކާރުން ވަނީ އޭނާއަށް ޚިދުމަތުގެ ޤައުމީ ޢިނާމު ވެސް ދެއްވާފައެވެ. ތިޔަ ދަރިވަރަކީ މުޙައްމަދު ޢިމްރާނު ކަމުގައި ބަލައިގެން އޭނާގެ އޮޓޯބައޮގްރަފީ ލިޔާށެވެ!

ލިޔުނީ: މުޙައްމަދު ޤާސިމު

އަޅުގަނޑު (އދ. މަތަރެސްފުށީ ފެންފިޔާޒުގޭ މުޙައްމަދު އިމްރާނު) އަކީ، އދ. މަތަރެސްފުށީ ހުދަންބަރުގޭ ހަސަން ފިކުރީއާއި ހަމަ އެގޭ ސަކީނާ ހަސަނަށް ލިބުނު 5 ކުދީންގެ ތެރެއިން އެންމެ ހަގު ދަރިފުޅެވެ. 1973 ވަނަ އަހަރު ފެބުރުވަރީ މަހު 18 ވަނަ ދުވަހު، ދުނިޔޭގެ އަލިކަން ދުށް، އަޅުގަނޑުގެ މައިގަނޑު މަސައްކަތަކީ، ކީރިތި ޤުރުއާން އުނގަންނައިދިނުމެވެ. ޢާއިލާގެ މެންބަރުންނާއި ރަޙުމަތްތެރިން ބުނާގޮތުގައި އަޅުގަނޑަކީ، މީހުންނާ ގުޅޭ، މަޑުމައިތިރިކަމަށް ލޯބިކުރާ މީހެކެވެ.

އަޅުގަނޑުމެން ބޮޑުވަމުން އައި ދުވަސްވަރަކީ ތަޢުލީމީ ދަންމަރުގެ އަލިކަން، ރަށަށް މާބޮޑަށް ފޯރާފައިވާ ދުވަސްވަރެއް ނޫނެވެ. ކިޔަވައިދޭ މަކުތަބެއް ހުއްޓެއްކަމަކު، އެއީ ހަމަ ނަމަކަށް ހުރި ތަނެކެވެ. އެހެންކަމުން އުމުރުން 7 އަހަރުގައި، މުދިންބޭގެ އަރިހަށް އަޅުގަނޑު ކިޔަވަންދާން ފެށީމެވެ. މުދީންބޭގެ އަރިހުން ކިޔެވި މައިގަނޑު އެއްޗަކީ ކީރިތި ޤުރުއާންކަމަށްވާތީ، އެ ދުވަސްވަރުން ފެށިގެން ކީރިތި ޤުރުއާން ކިޔެވުމުގެ ޝައުޤުވެރިކަން އަޅުގަނޑުގެ ހިތުގައި ވަނީ އުފެދިފައެވެ. އެހެންކަމުން އުމުރުން 15 އަހަރުގައި މާލެ އައިސް، “ޢިލްމުލް މުޤައްދަސް” ނަމަކަށް ކިޔައި ޤުރުއާން ކުލާހަކަށް ވަދެ ކިޔަވަން ފެށީމެވެ.

އެ ކުލާހުގައި 5 އަހަރު ހޭދަކުރެވުނު އިރު އަޅުގަނޑަށް ވަނީ ކީރިތި ޤުރުއާނުގެ 20 ފޮތް ހިތުދަސްވެފައެވެ. ތަފާތު 5 ރާގަށް ކިޔަވަން ދަސްވެފައެވެ. ޤާރީކަމުގެ ސެޓުފިކެޓު ލިބިފައެވެ. އެހެންކަމުން މާލޭގައި ހުރެވެން ވެސް ނެތުމާއެކު، 1993 ވަނަ އަޅުގަނޑު އެނބުރި ރަށަށް އައީ، އަޅުގަނޑަށް އެނގިފައިހުރި ޢިލްމެއް، ރަށުގެ ދަރީންނަށް ފޯރުކޮށްދިނުމުގެ މާތް މަޤުޞަދުގައެވެ.

ރަށަށް އައިސް ޢާއިލާގެ އެންމެހައި މެންބަރުންގެ އެހީތެރިކަމާއެކު، ގޭގެ ސިޓިންރޫމުގައި 10 ކުދީންނަށް ދައްޗެއްނެތި ކިޔެވޭނެ އިންތިޒާމް ހަމަޖައްސައި، ކުދީންނަށް ޤުރުއާން ކިޔަވައިދިނުމުގެ މަސައްކަތް 1994 ވަނަ އަހަރު ޖަނަވަރީމަހު ފުރަތަމަ ދުވަހު ފެށީމެވެ. ކުއްޖަކު އަތުން މަހަކު 25 ރުފިޔާ ނަގައިގެން ފެށި މި މަސައްކަތް 2000 ވަނަ އަހަރު ފެށުނު އިރު ވަނީ، “ކަލާމްފުޅު” މި ނަމުގައި ރަސްމީކޮށް ކިޔަވައިދޭ ކުލާހަކަށް ބަދަލުކުރެވިފައެވެ.

އަތޮޅުފެންވަރުގައި 2003 ވަނަ އަހަރުންފެށިގެން ބާއްވަމުން އަންނަ “އދ. އަތޮޅު ޤުރުއާން މުބާރާތުގައި ވިދިވިދިގެން 3 ފަހަރު އެއް ވަނަ ލިބުނީ “ކަލާމްފުޅު” ކުލާހުގެ ދަރިވަރުންނަށްކަމުން، މުޅި އަތޮޅަށް އަޅުގަނޑުގެ ކުލާސް މަޝްހޫރުވެގެން ދިޔައެވެ. ނަތީޖާއަކަށްވީ، އަތޮޅުގެ އެކި ރަށްރަށުން އަޅުގަނޑުގެ ކުލާހަށް ކުދީން އަންނަން ފެށުމެވެ. އެހެންކަމުން މިހައިތަނަށް އައި އިރު، އަތޮޅުގެ ކޮންމެ ރަށެއްގައި ވެސް އަޅުގަނޑުގެ ގާތުން ޤުރުއާން ކިޔަވަން ދަސްކޮށްފައިވާ ދަރިވަރުން ތިބޭނެކަން މި ފާހަގަކޮށްލަނީ ފަޚުރުވެރިކަމާއެކުގައެވެ.

މި ދާއިރާއިން އަޅުގަނޑަށް ލިބުނު އެންމެ ބޮޑު ކާމިޔާބީއަކީ، 2012 ވަނަ އަހަރު ނޮވެންބަރު މަހު، ޢާންމު ޚިދުމަތަށް ހިތްވަރުދިނުމުގެ ޤައުމީ ޢިނާމު، ރައީސުލްޖުމްހޫރިއްޔާގެ އަތްޕުޅުން ލިބުމެވެ.

1997 ވަނަ އަހަރު، އދ. މަތަރެސްފުށީ ދުނބުރިމާގޭ އައިޝަތު ނާޒާއެކު ޒަވާޖީ ޙަޔާތެއް ފަށައި، މިހާރު އަޅުގަނޑަށް ވަނީ 3 ފިރިހެން ކުދީން ލިބިފައެވެ. އަޅުގަނޑުގެ އުއްމީދަކީ، އަޅުގަނޑުގެ ދަރީންނަކީ ވެސް ޤައުމަށް ފައިދާހުރި ދާއިރާއަކުން ޚިދުމަތްކުރާނެ ދަރީންކޮޅަކަށް ވެގެން ދިޔުމެވެ.