ލާނެތް ސަމާސާ…؟

ލިޔުނީ: މުޙައްމަދު ޤާސިމް/ އއ. މަތިވެރި

މި ކަމަށް ވެސް ކިޔަންވީ ދިވެހީންގެ ކިބައިގައި ހުންނަ ސިޔާސަކަމުން ލާނެތްކަމުން ކުރާ ކަމެކޭ ހެއްޔެވެ؟ ނޫނީ ހަމަ މަޖަލަށް ކޮށްލާ ކަމަކޭ ހެއްޔެވެ؟ އެކަމަކު އެހެން ބުނާހިތެއް ނެތެވެ. މިއީ ލާނެތް ވެގެން، ސިޔާސަވެގެން، މަޖަލަށް ކުރާން ހެޔޮވާވަރުގެ ކަމެއްކަމަށް، އަމިއްލަ ޒަމީރު ގަބޫލު ނުކުރާތީއެވެ. އެއަށްވުރެ މާ ނުރައްކާތެރި، ބިރުހުރި ކަމަކަށް ވާތީއެވެ. ބުނާން މިއުޅެނީ ބައެއް ދިވެހީން މިހާރަކަށް އައިސް ކޮންމެވެސް މިންވަރަކަށް ފުހުންނާއި ސިފައިންނާ ކުރާ “ސަމާސާ” ގެ ވާހަކައެވެ.

ދާދި މިދާކަށް ދުވަހު ފެނުނު މަންޒަރެކެވެ. އެއީ އެދުވަހުގެ މެންދުރު ފަހުގެ ވަގުތެވެ. މެދަށް އަޑިވެފައި ވާތީ، ގެއާ ދިމާއަަށް ދުއްވުނީ ތަންކޮޅެެއް ބާރަށެވެ. ތަންކޮޅަކަށް ދިޔަތަނާ ކަންފަތުގައި ޖެހުނީ އަލިފާން ނިވާ އުޅަނދެއް “ހަޅޭއްލަވަމުން” ވައިކަފާފައި ފަހަތުން އަންނަ އަޑެވެ. މަގުގެ އެއްފަރާތެއްގައި މަޑުކޮށްލައިފީއެވެ. ވާނުވާ ނޭނގި އިނދެއެވެ.

ކަންދިމާކުރި ގޮތުން އެ އުޅަނދު އައިސް މަޑުކޮށްލީ، އަޅުގަނޑު މަޑުކޮށްލައިގެން އިން ހިސާބާ ވަރަށް ކައިރިއަށެވެ. ތައްޔާރީ ހާލަތުގައި ތިބި ދެތިން ހަތަރު ސިފައިން، ވަގުތުން އެއިން ފުންމާލައިފިއެވެ. މާސްކު އަޅަމުން، އަވަސް އަވަހަށް، ހަލުއިކަމާއެކު ހިނގައިގަތީ، އެދިމާގައި ހުރި ގެއެއްގެ ދޮރާއްޓާ ދިމާއަށެވެ. ރަނގަޅަށް ބަލައިލުމުން، އެގޭ ގޯތިތެރެއިން ދުމުގެ އަސަރު ފެނިއްޖެއެވެ. އޭރު އެހިސާބަށް މީހުން އެއްވާން ފަށައިފިއެވެ.

އެތެރެއަށް ވަން ސިފައިންގެ މީހުން، ދިހަވަރަކަށް ސިކުންތުގެ ތެރޭގައި ނިކުމެއްޖެއެވެ. ކޯޓު ބާލަމުންނެވެ. މާސްކު ނަގަމުންނެވެ. އެތެރެއަށް ވަންއިރު ހުރި ހާސްކަމާއި، ސީރިޔަސްކަން މޫނުމަތިން ވަނީ މުޅީން ފިލާފައެވެ. ބައެއް މީހުންގެ ތުންފަތްމަތީން ހިނިތުންވުން ވެސް ފެނުނެވެ. އެހެންނަމަވެސް އަނެއް ބަޔަކުގެ މޫނުމަތީން ފެނުނީ ހިތްހަމަނުޖެހުމުގެ ކުލަވަރެވެ. އެމީހުން އެދިޔަ ގޮތަށް ގޮސް، އެމީހުން އައި އުޅަނދަށް އަރައިފިއެވެ. އާދައިގެ ދުވެއްޔެއްގައި އުޅަނދު ދުއްވާލައިފިއެވެ.

ވީގޮތް އެނގުނީ، ކައިރިއަށް ޖެހިލުމުންނެވެ. ސިފައިން ވަން ދޮރޯށި ހުޅުވައި އެތެރެއަށް ބޯ ދިއްކުރި މީހުންގެ ތެރޭގައި ހިމެނިލުމުންނެވެ. އެއީ ފުދޭވަރެއްގެ ހުސްބިމެއް އޮތް ގޯއްޗެކެވެ. އެގޭ މީހުން މަސްފިހާން ނާށި އަންދަނީއެވެ. އަރާ ދުމަކީ އެއީއެވެ. ސިފައިން ތައްޔާރީ ހާލަތުގައި އައީ، ފަހަރެއްގައި ވެސް އަރަމުން އައި ދުން ފެނިގެނެއް ނޫނެވެ. މީހަކު ފޯނުކޮށްފައި އެގޭގައި އަލިފާނުގެ ހާދިސާއެއް ހިނގައިގެން އުޅޭ ވާހަކަ ބުނެގެންނެވެ. ސިޔާސަކަމުން މީހަކު މަޖަލަކަށް ކޮށްލި ކަމެކޯލައެވެ.

ނިމިގެން މިދިޔަ ރޯދަމަހު ވެސް ހަމަ މިކަހަލަ ކަމެއް ދިމާވިއެވެ. އެއީ އެދުވަހުގެ މެންދުރުކުރީގެ ވަގުތެވެ. އެއްކޮޅަށް ދުއްވޭ ހަނިގޯޅިއެއްގެ ތެރޭގައި ފުލުހުން މާގިން ހަރަކާތްތެރިވެ އުޅޭތީ، ވާނުވާ ބަލައިލާ ހިތުން ގޮސް ކަރިވެލައިފީއެވެ. އޭރު، އެތަނުގައި ހުރި ގެއަކަށް ފުލުހުން ވަދެ ނިކުމެވާތަން ފެނެއެވެ. އެތާ ހުރި މީހެއްގާތު ވެގެން އުޅޭގޮތެއް އަހައިލީމެވެ. އޭނާ ކިޔައިދިން ގޮތުން އެނގުނީ، އެގޭގައި މީހަކު ދަންޖެހޭން އުޅެނީއޭ ކިޔައިގެން މީހަކު ފުލުހުންނަށް ރިޕޯޓުކުރީކަމެވެ. އެހެނަސް ކަންނިމިގެން ދިޔައިރު އެއީ ދޮގު ރިޕޯޓެކެވެ. ފުލުހުންގެ އަގުހުރި ވަގުތުން އެތައް ވަގުތެއް ބޭކާރުވީއެވެ. މިއީ ވެސް ހަމަ މީހަކު ފުލުހުންނާ ކޮށްލި ލާނެތް ސަމާސާ އެކެވެ.

މި ދެކަންތައް އަމިއްލަ ލޮލަށް ފެނި، ތަޖުރިބާކޮށްލާން ޖެހުމުން ހިތަށް އަރަނީ، މިއީ ވެސް މިއަދު މި މާލޭގައި އާންމުވަމުން އަންނަ ކަމަކީބާވައެވެ؟ އެހެންވެއްޖެނަމަ އޭގެ ނަތީޖާ ފެންނާނީ ކިހިނެއް ބާވައެވެ؟ އާންމުންގެ ފަރާތުން ސިފައިންނާއި ފުލުހުންނަށް އަންނަ މިފަދަ ސަމާސާ ފޯނުކޯލުތައް ގިނަވަމުން އައިސް، އާންމުންގެ ކޯލުތަކުގެ އިތުބާރު ގެއްލޭގޮތްް މެދުވެރިވެއްޖެ ނަމަ، ނުރައްކާތެރި ދަނޑިވަޅުގައި ގުޅާލައި ފަހަރު، ފުލުހުންނާއި ސިފައިންނަށް އެކަމަށް ސީރިޔަސް ނުވެވޭ ފަދަ ގޮތެއް މެދުވެރިވުމަކީ ހަމަ ވެދާނޭ ކަމެކޭ ހިތަށް އަރަނީއެވެ. އެއީ ވެސް އިންސާނުން ކަމަށް ވާތީއެވެ.

“ސަމާސާއަށް ނަމަވެސް ދޮގެއް ނުހަދާށެވެ!” މިނަން ކިޔާ ވާހަކައިގައި އުޅޭ ކުޑަކުއްޖާއަށް ވީގޮތް، އެއީ ވެސް އިބުރަތުން ފުރިގެންވާ ފިލާވަޅެކެވެ. ކުޑައިރު އެފަދަ ވާހަކަތައް މައިން ބަފައިންނާއި މުދައްރިސުން ކިޔައިދެނީ، ބޮޑުވީމާ އެއިން ޢިބުރަތް ޙާޞިލު ނުކުރާ ގޮތަކަށް ނޫނެވެ. މަޖަލަކަށް، ސަމާސާއަކަށް ނަމަވެސް، ތިކަހަލަ ލާނެތް ސަމާސާ ނުކުރާށެވެ! އެފަދަ ކަންކަމުގެ ސަބަބުން ގެއްލެނީ ފުލުހުންނާއި، ސިފައިންގެ މުހިންމު ވަގުތުތަކެވެ. ދައުލަތުގެ އަގުހުރި ފައިސާއެވެ. ރައްޔިތުންގެ ކަރާމާތްތެރި އަގެވެ.