ރީތި އަޑަކުން ކީރިތި ޤުރުއާން

ކީރިތި ޤުރުއާން އުނގަންނައިދީ، އެ ޢިލްމުގެ ނޫރުން މުޅި އަތޮޅު ހުޅުދާންކުރުމަށް އަތުކުރި އޮޅާލައިގެން ހުރި، އދ. މަތަރެސްފުށީ ފެންފިޔާޒުގޭ އަލްޤާރީ މުޙައްމަދު އިމްރާނަކީ، އދ. މަތަރެސްފުށީ ހުދަންބަރުގޭ ހަސަން ފިކުރީއާއި ހަމަ އެގޭ ސަކީނާ ހަސަނަށް ލިބުނު 5 ކުދީންގެ ތެރެއިން އެންމެ ހަގު ދަރިފުޅެވެ. 1973 ވަނަ އަހަރު ފެބުރުވަރީ މަހުގެ 18 ވަނަ ދުވަހު ދުނިޔޭގެ އަލިކަން ދުށް އިމްރާނަކީ، މީހުންނާ ގުޅޭ، މަޑުމައިތިރި، މާތް އަޚުލާޤެއްގެ ވެރިއެކެވެ.

މުޙައްމަދު ޢިމްރާނުގެ ތަޢުލީމީ ޙަޔާތުގެ ބިންގާ އެޅީ، އޭނާގެ އުމުރުން 6 އަހަރުގައި، އެ ރަށުގެ މަކުތަބުންނެވެ. ހަމަ އެ އަހަރު، އެ ރަށު މުދިންބޭގެ އަރިހަށް ޤުރުއާން ކިޔަވަންދާން ވެސް އޭނާ ފެށިއެވެ. އެ ދުވަސްވަރަކީ، ތަޢުލީމީ ދަންމަރުގެ އަލިކަން، އެ ރަށަށް މާބޮޑަށް ފޯރާފައިވާ ދުވަސްވަރެއް ނޫނެވެ. އެހެންކަމުން ރަށުން ގުރޭޑު 7 އާ ހަމައަށް ކިޔެވުމަށްފަހު، އުމުރުން 15 އަހަރުގައި، އޭނާ ބަދަލުވީ މާލެއަށެވެ. މުދިންބޭގެ އަރިހުން ޤުރުއާން ކިޔަވަން ފެށުމުން، އޭނާގެ ހިތުގައި އިންދުނު، ކީރިތި ޤުރުއާން ކިޔެވުމުގެ ޝައުޤުވެރިކަމުގެ އޮށުން އޭރު ގަސްފަޅާފައިވާތީ، މާލެ އައިސް، އޭނާ ވަނީ [ޢިލްމުލް މުޤައްދަސް]ގެ ނަމުގައި ހިންގަމުން ގެންދިޔަ ޤުރުއާން ކުލާހަކަށެވެ.

އެ ކުލާހުގައި 5 އަހަރު ހޭދަކުރެވުނު އިރު އޭނާއަށް ވަނީ ކީރިތި ޤުރުއާނުގެ 20 ފޮތް ހިތުދަސްވެފައެވެ. ތަފާތު 5 ރާގަށް ކިޔަވަން ދަސްވެފައެވެ. ޤާރީކަމުގެ ސެޓުފިކެޓު ލިބިފައެވެ. އެހެންކަމުން މާލޭގައި ހުރެވެން ވެސް ނެތުމާއެކު،  1993 ވަނަ އަހަރު އޭނާ އެނބުރި ރަށަށް އައީ، އޭނާއަށް އެނގިފައި ހުރި ޤުރުއާނުގެ ޢިލްމުން، އެ ރަށުގެ ކުދިންގެ ހިތްތައް ރޯޝަންކުރުމުގެ މާތް މަޤުޞަދުގައެވެ.

ރަށަށް އައިސް ޢާއިލާގެ އެންމެހައި މެންބަރުންގެ އެހީތެރިކަމާއެކު، ގޭގެ ސިޓިންރޫމުގައި 10 ކުދީންނަށް ދައްޗެއްނެތި ކިޔެވޭނެ އިންތިޒާމް ހަމަޖައްސައި، ކުޑަ ކުދީންނަށް ޤުރުއާން ކިޔަވައިދިނުމުގެ މަސައްކަތް 1994 ވަނަ އަހަރު ޖަނަވަރީމަހުގެ ފުރަތަމަ ދުވަހު އޭނާ ފެށިއެވެ. ކުއްޖެއްގެ އަތުން މަހަކު 50 ރުފިޔާ ނަގައިގެން ފެށި މި މަސައްކަތް، 2000 ވަނަ އަހަރު ފެށުނު އިރު ވަނީ [ކަލާމްފުޅު] މި ނަމުގައި ރަސްމީކޮށް ކިޔަވައިދޭ ކުލާހަކަށް ބަދަލުކުރެވިފައެވެ.

އަތޮޅުފެންވަރުގައި 2003 ވަނަ އަހަރު ބާއްވަންފެށި، އދ. އަތޮޅު ޤުރުއާން މުބާރާތުގައި، ވިދިވިދިގެން 3 އަހަރު، މުބާރާތުގެ ފަޚުރުވެރި ތަށި އުފުލައިލުމުގެ ޝަރަފު ލިބުނީ [ކަލާމްފުޅު] ކުލާހުގެ ދަރިވަރުންނަށެވެ. އެހެންކަމުން، މުޅި އަތޮޅުގައި [ކަލާމްފުޅު] ކުލާހުގެ ނަން، ރަން އަކުރުން ވިދާންފެށިއެވެ. ނަތީޖާއަކަށްވީ، އަތޮޅުގެ އެކި ރަށްރަށުން އެ ކުލާހަށް ކުދީން ކިޔަވާން އަންނާން ފެށުމެވެ. އެހެންކަމުން މިހައި ތަނަށް އައި އިރު، އިމްރާނުގެ ރީތި އަޑުމަޚުރަޖުން އުފާ ޙާޞިލުކޮށް، އެ އަޑު ހިތުގައި ބިންވަޅުނެގިފައިވާ ދަރިވަރުން، އެ އަތޮޅުގެ ކޮންމެ ރަށެއްގައި ވެސް އެބަ ތިއްބެވެ.

އިމްރާނުގެ މި އަގުހުރި ޚިދުމަތްތަކުގެ އަގު ވަޒަންކުރައްވައި، 2012 ވަނަ އަހަރު ރައީސުލްޖުމްހޫރިއްޔާ ވަނީ، ޢާންމު ޚިދުމަތަށް ހިތްވަރުދިނުމުގެ ޤައުމީ ޢިނާމު އިމްރާނަށް ދެއްވާފައެވެ.

މިއަދު ވެސް ޤުރުއާން އުނގަންނައިދިނުމުގެ މަސައްކަތުގައި ހީވާގިކަމާއެކު ހަރަކާތްތެރިވަމުން އަންނަ އިމްރާނު ވަނީ، 2007 ވަނަ އަހަރު، އދ. މަތަރެސްފުށީ ދުނބުރިމާގޭ އައިޝަތު ނާޒާއެކު ޒަވާޖީ ޙަޔާތެއް ފަށާފައެވެ. އެ ކައިވަންޏަށް ވަނީ، ފިރިހެން ކުއްޖަކާއި 3 އަންހެން ކުދީން ލިބިފައެވެ. އިމްރާނުގެ އުއްމީދަކީ، އޭނާގެ ޤުރުއާން ކުލާހުގެ ވިދުވަރު، ރާއްޖޭގެ ކަންކޮޅުތަކަށް ފޯރުކޮށްދީ، ސެޓިފިކެޓް ލެވަލްގެ ޤުރުއާން ކޯސްތައް ހިންގޭ ފަދަ ކުލާހަކަށް އެ ކުލާސް ހެދުމެވެ.