ނުވަރަ އެލިޔާ (ނޫރަލިޔާ) އަށް ކުރެވުނު [ފެން] ދަތުރު- 5

ބުލޫ ފީލްޑް ޓީ ގަރޑެންއިން ކަޅެއް

ތާޒާ ސްޓޯބެރީގެ ފިނި ބުއިންތަކުން ހަށިގަނޑު އިތުރަށް ފިނިކޮށްލައިގެން ގޮސް، އެންމެން ވޭނަށް އެރިއިރު އެކެއްޖަހައިފިއެވެ. އޭރުވެސް ހިމަފޮދު ވާރެއޭ ބުނާ މިންވަރަށްވުރެ، ތަންކޮޅެއް ބޯކޮށް ވާރޭ ވެހެމުންދެއެވެ. އެންމެން ވޭނަށް އެރުމުން، އަނެއްކާވެސް ނައްޓާލައިފިއެވެ. މި ފަހަރުގެ މަންޒިލަކީ ރަމްބޯޑާގައި ހުރި “ބުލޫ ފީލްޑް ޓީ ގަރޑެން” އެވެ. އެއީ ސައިފަތުގެ ޚާއްޞަ ތަނެކެވެ.

ވޭން މަޑުކޮށްލާފައި “ބުލޫ ފީލްޑް ޓީ ގަރޑެން” އަށް އާދެވުނީ ކަމަށް ޑުރައިވަރު ބުނުމުން އަވަސް އަވަހަށް ފައިބައިފީމެވެ. އެއީ ބޮޑު އިމާރާތަކެވެ. އެ އިމާރާތުގައި “ހެޑު އޮފީހުގެ އިތުރުން، “ޓީ ސެންޓަރ” އަކާއި “ޕޭސްޓްރީ ޝޮޕް” އަކާއި، “ރެސްޓޯރެންޓް” އަކާއި ކުޑަކުދީންގެ ޕާކަކާއި “ޓީ ނާސަރީ” އަކާއި “ފެކްޓްރީ” އެއް ވެސް ހިމެނެއެވެ. އެކި ނަންނަމުގެ ސައިފަތްތައް ވިއްކާ ފިހާރައެއް ވެސް ހިމެނެއެވެ. އެ ތަނަށް ވަދެ، ތަންތަން ބަލައިލައި ހޫނު ކަޅުސަޔެއް ބޯލައިގެން އަނެއްކާ ވެސް ނައްޓާލީއެވެ. މަންޒިލަކީ ކެންޑީއެވެ.

ކެންޑީގައި ވަގުތުކޮޅެއް

ކެންޑީއަށް ފޯރިއިރު ގާތްގަނޑަކަށް މެންދުރުން އަނބުރައި ދެ ގަޑިބައިވެ ބޮޑުވެއްޖެއެވެ. އަޅުގަނޑުމެން ފުރަތަމަ އުޅުނީ ކެންޑީގައި ހުންނަ އެލެފެންޓް ޕާކަށް ވަންނާށެވެ. އެހެންނަމަވެސް ވާރޭވެހޭތީ، އެ ތަނަށް ވަންނާކަށް ގިނަ މީހުން ބޭނުމެއް ނުވިއެވެ. އެހެންކަމުން މަގުގެ ދެ ފަރާތުގައި އަތުރާފައި ހުރި، މޭޒުތައް ކައިރިއަށް ގޮސް، އެކި ބާވަތްތަކުގެ މޭވާއާއި ލުއިކާނާ ގަނެގެން، ކުޑައިރުކޮޅަކު އެ ސަރަޙައްދުގައި ހިނގާލާފައި އަނެއްކާވެސް އެރީ ވޭނަށެވެ. އޭރު ވެސް ހިމަފޮދު ވާރޭ ވެހެމުންދެއެވެ.

ވޭން ދުއްވާލައިފިއެވެ. މަންޒިލަކީ ކައި އެއްޗެއް ލިބޭ ކަހަލަ ރަނގަޅު ރެސްޓޯރެންޓެކެވެ. ފުރަތަމަ ވަން ރެސްޓޯރެންޓުން ކަމުދާ ކަހަލަ ކާއެއްޗެއް ލިބެން ނެތުމުން، އެތަނުން ފާޚާނާކޮށްލައިގެން އަނެއްކާވެސް ނައްޓާލީއެވެ. ދެން ގޮސް ވަނީ ކޮލަމްބޯ ރޯޑުގައި ހުރި “ހޮޓެލް މަޕޫރާ” އަށެވެ. އެއީ ބޮޑު ތަނެކެވެ. އެތެރެއަށް ވަންނަން ހުންނަ ދޮރުން ފުރަތަމަ ވެސް ފައި އެޅެނީ ކުޑަ ސިޑިއެއްގެ ފުރަތަމަ ހަރުފަތަށެވެ. ސިޑީގެ ދެ ފަރާތު ފަޑި ހަދާފައި ހުރީ ސިމެންތިންނެވެ. ފަރުމާކޮށްފައި ހުރީ މުސްކުޅި ގޮތަކަށެވެ. ދެ ފަރާތުގައި ކޮންމެވެސް ވަރަކަށް ގަސް އިންދާފައި ހުއްޓެވެ. އެ ސިޑިން މައްޗަށް އަރައި، ފެންޑާއެއްހެން އޮތް ހުސްތަނުގައި ހުރި ދިގު މޭޒުކައިރީގައި ޖައްސައިލީމެވެ. ގިނަ އިރެއް ނުވެ ވޭޓަރަކު އަތުވެއްޖެއެވެ. މެނޫ ދިނުމުން، އެކި މީހުން އޯޑަރު ދިނީ، އެކި އެއްޗިއްސަށެވެ. ކައި އެއްޗިއްސާއި ބޯ އެއްޗިއްސަށެވެ. މައިގަނޑު އެއްޗަކަށް ގެނައީ ފްރައިޑް ރައިސްއެވެ. އެހެންނަމަވެސް ބޯން އެކި މީހުން ގެނައީ އެކި އެއްޗިއްސެވެ.

އެހައިތަނުން ދެން އޮތީ ކެއުމާއި ބުއިމެވެ. ބަނޑުހައިވެފައި ތިބި ވަރުން ވެސް ތޯއްޗެކެވެ. ގެނައި ކާތަކެތި ވަރަށް މީރެވެ. އެހެންކަމުން ބަނޑަށް އުނދަގޫވާ ވަރަށް ކެވުނެވެ. ބަނޑުން ލޯއަޑު ކިޔާވަރަށް ކެވުނޭ ބުނަނީ މި ވަރަށް ކެވުނީމާ ކަންނޭނގެއެވެ.

ކޮލަމްބޯއަށް މިސްރާބު ޖަހާފައި

ކައި ނިމިގެން ނައްޓާލެވުނުއިރު، ހުރީ ހަވީރު ހަތަރެއްޖަހަން ވެފައެވެ. ވޭނަށް އަރައި ހަމަޖެހިލުމާއެކު، ވޭން ނައްޓާލައިފިއެވެ. މަންޒިލަކީ ކޮލަމްބޯއެވެ. ނުވަރަ އެލިޔާއަށް ކުރި ދަތުރު ނިންމާލުމަށް ޓަކައި ކުރެވޭ ފަހު ދަތުރެވެ. އޭރު ވެސް ކުޑަކޮށް ވާރޭކަނި ޖަހައެވެ. ގާތްގަނޑަކަށް މުޅި ދަތުރު ކަހަލަ ގޮތަކަށް މި ދިޔައީ މި ކަހަލަ ގޮތަކަށް ވާރޭގެ ތެރޭގައެވެ. ފެން ދަތުރެއްގެ ގޮތުގައެވެ.

ވޭން ދުއްވާލިތާ ގިނަ އިރުތަކެއްނުވެ، ދެ ލޯ ފުރާ ނިދިއަތުވެއްޖެއެވެ. ކެއުމުން ލިބުނު ވަރުބަލިކަމާއި ޖައްވުގައި ހިފާފައިހުރި ތެތް ފިނީގެ ސަބަބުން، ހަށިގަނޑަށް ލިބިފައިވާ ކަންނެތްކަމާއި ވޭނުގެ އިންޖީނުގެ ނާނާގެ އަޑުގެ ޖާދޫގައި ޖެހުނީއެވެ. ޝީޓުގައި އިށީނދެ ހަށިގަނޑު ދަމައިލިތާ މާ ގިނައިރެއްނުވެ، ނިދީގެ ބާރުގެ ދަށަށް ގެންގޮސް، ހުވަފެނީ ޢާލަމަކަށް އަޅުގަނޑު ވައްދައިފިއެވެ. ނުވަރަ އެލިޔާ ދަތުރުގެ ހުރިހައިކަމެއް އެއްފަރާތަށް ކެހިގެން ގޮސް، މުޅިން އެހެން ދުނިޔެއެއްގައި އަޅުގަނޑު މަޝްޣޫލުކުރުވައިފިއެވެ.

އަޅުގަނޑުގެ ލޯ ހުޅުވުނީ ވޭނުގެ ދުވެލި މަޑުވުމުންނެވެ. އޭރު ޖައްވަށް ވަނީ އަނދިރިކަން ވެރިވެފައެވެ. ގަޑިއަށް ބަލައިލިއިރު، އިރުއޮއްސި ހަތެއް ޖަހައި ބޮޑުވެއްޖެއެވެ. ވޭނުގެ ތެރެއަށް ނަޒަރު ހިންގައިލިއިރު، އެންމެން ތިބީ އެއް ހާލެއްގައެވެ. ދެ ލޮލުގެ އެތެރެ ފެންނަ މީހުންނަށްވުރެ ނުފެންނަ މީހުން ގިނައެވެ. މަގުމައްޗަށް ނަޒަރު ހިންގައިލިއިރު، މަގުމަތި ވަނީ ކާރޫބާރޫ ބޮޑުވެފައެވެ. ޓުކްޓުކާއި ކާރާއި ވޭނާއި ބަސް ފަދަ އުޅަނދުތަކުން ތޮއްޖެހިފައެވެ. ކޮލަމްބޯއަށް ވަދެވުނީކަން ކަށަވަރެވެ.

ހިންދެމިލައި ދުއްވައިގަންނާނޭ ފަދަ ފުރުޞަތެއް ވޭނަކަށް ހަމަ އެއްގޮތަކަށް ވެސް ލިބޭގޮތެއް ނުވެއެވެ. ކުރިއަށް ދާން ޖެހެނީ، ހުއްޓެމުން ފިރުކެމުން ކަހަލަ ގޮތަކަށެވެ. ކޮޅަކުން ކޮޅަކަށް ގުޑާނުލެވި، ފަސްހަ މިނެޓު ވެސް އޮންނާން ޖެހިދެއެވެ. އެ ވަގުތުތައް ވެސް ހޭދަވެގެން ދިޔައީ ނިދެމުން ހޭލެވެމުން ކަހަލަ ގޮތަކަށެވެ.

ދަތުރުގެ ނިމުން

އެ ރޭގެ ގާތްގަނޑަކަށް 9:15 އެހައިކަންހައިއިރު، އަޅުގަނޑުންމެން ތިބޭ ހޮޓެލް ކަމަށްވާ “މެގް އެޕާޓްމަންޓް 35” ކައިރިއަށް ވޭން މަޑުކޮށްލައިފިއެވެ.  އެއާއެކު އެންމެން ވޭނުން ފައިބައި، ދަބަސްތަކާއި ގެންދިޔަ އެހެނިހެން ސާމާނުތައް ވޭނުން ބޭލުމަށްފަހު، ވޭނުގެ އަގު އަދާކޮށްފައި، ހޮޓަލުގެ ގޭޓުން ވަދެގެން ދިޔައިރު، ކޮންމެ މީހެއްގެ ހިނގުމުގައި ވެސް ހުރީ ވަރުބަލިކަމެވެ. މޫނުމަތީންނާއި ދެ ލޮލުން ފާޅުވަމުން ދަނީ ނިދީގެ އަސަރެވެ.

މިއީ އަޅުގަނޑާއި އަޅުގަނޑުގެ ޢާއިލާ ނުވަރަ އެލިޔާއަށް ކުރި ފުރަތަމަ ދަތުރެވެ. ވަރަށް ފޮނި ޚިޔާލީފޮލާތައް ކައްކައި، ތަފާތު ހުވަފެންތައް ދުށުމަށްފަހު، ކުރެވުނު މި ދަތުރު ވެގެންދިޔައީ، މުޅިން ތަފާތު ދަތުރަކަށެވެ. ވިއްސާރައިގެ ސަބަބުންނެވެ. ބުނެވޭނީ ހަމަ ފެން ދަތުރެއް ކަމަށެވެ. އެހެނަސް ތަފާތު ތަޖުރިބާއެކެވެ.

ނިމުނީ