ނަޒަރާއި އަޑު 4

“ނަޒަރާއި އަޑު” މި ނަމުގައި އަޅުގަނޑު ލިޔަން މި ފަށަނީ، އަޅުގަނޑަށް ފެންނަ އަދި ތަޖުރިބާ ކުރެވޭ ކަންކަމާއި، އެކި މީސްމީހުން ކިޔައިދީފައި ހުންނަ މި ބާވަތުގެ ކަންކަމުގެ މައްޗަށް ކުރުކުރުކޮށް ލިޔާ ލިޔުންތަކެކެވެ. މި ލިޔުންތަކުން އެއްވެސް ސިފައެއްގައި ބަޔަކަށް ފައިދާއެއްކޮށްފި ނަމަ، އަޅުގަނޑުގެ މަޤުޞަދު ޙާޞިލުވީއެވެ.

ނަފުސުގެ ދުޝްމަން

ރޭގަނޑެއްގެ ނުވައެއް ޖަހައި އެހައިކަންހާއިރެވެ. ދެކުނުގެ ރަށެއްގައި ދިރިއުޅޭ، ގާތް ރައްޓެއްސަކު، ޗުއްޓީގައި މާލެ އައިސް އުޅޭތީ، އޭނާއާ ބައްދަލުކޮށް ވާހަކަ ދައްކާލުމުގެ ނިޔަތުގައި ބައްދަލުވި ރެއެކެވެ. ދެ މީހުން ދިޔައީ ކެފޭއަކަށެވެ. މި ޒަމާނުގައި އެކަކު އަނެކަކާ ބައްދަލުވެލައި، ހާލުއަހުވާލު އަހައިލަން ވެސް ޖައްސައިލާނީ ކޮފީއަކަށެވެ. ކޮފީތަށްޓެއް ކުރިމަތީގައި ބެހެއްޓީމާ ނޫނީ، ހާލުއަހުވާލު ވެސް އަހައިނުލެވޭހައި ހިސާބަށް އެކަންކަން ވަނީ ތަރައްޤީވެފައެވެ. ކޮފީއަށް އެރުން ވައިގައި ހިފާފައި ހުރި މިންވަރަކީ، ހޮޓަލަކަށް ވެދެ، ދެބަނޑަށް ކާން އިންދާ މީހަކު ގުޅާފައި، ކޮބާ ކޮންތާކުހޭ އަހައިލާއިރު، އޭނާ އިންނާނީ، ރައްޓެއްސަކާއެކު ކޮފީއެއްގައެވެ. އެހެންވީމާ މި ޒަމާނުގައި ކުކުޅުބިރިޔާނީ، މަސްބުރި ރިހަ، ރިހާކުރާއި ބަތް، މިހިރީ ހައްތާ ވެސް ނަމުގައި ކޮފީއެވެ.

ކަން މިހެން އޮތް ނަމަވެސް، މި ދެންނެވި ރޭގައި އަހަރެން ގޮސް ނެގީ، ހަމަ ސީދާ ކިރުކޮފީއެކެވެ. އެކުވެރިޔާ ނެގި އެތި އޭނާގެ ދުލުން ބުނަން ދޫކޮށްލާފައި، އަސްލު މަޢުޟޫއަށް އެނބުރޭނަމެވެ. އަހަރެމެން ދެ މީހުން، އެކިއެކި ވާހަކައިގައި އެހެން ތިބިއިރު، ކުރިމަތީގައި ހުރި މޭޒުދޮށުގައި، ދެބައި އުމުރަށްވުރެ ކުޑަތަންކޮޅެއް ޒުވާންކޮށް ފެންނަ ފިރިހެނަކު، ބައިވެރިއަކު ނެތިފައި އިނެވެ. އެހެންނަމަވެސް މާ ގިނައިރު އެހެން އިންނާކަށް އޭނާއަކަށް ނުޖެހުނެވެ. އިތުރު ދެ މީހަކު އައިސް، ހިނިތުންވެލަމުން، އެ މޭޒު ފަޅުފިލުވައިދީފިއެވެ. ފެންނަ ފެނުމަށް އައިސް އެ އިށީނނީ ދެ މައިންނެވެ. ޒުވާން މަންމައަކާއި ސާދަ ފަނަރަ އަހަރުގެ އަންހެންކުއްޖެކެވެ. ލުއިލުއި މޭކަޕެއްގައި ހުރިއިރު، އެކުއްޖާ ފެންނަލެއް ވަރަށް “ކިއުޓް” އެވެ.

އެ “ދެމައިން” އައިސް އިށީނދެ، ދެ މިނެޓެއްހައި އިރު ވެސް ނުވާނެއެވެ. ކައި އެއްޗެހި ގެނެސް ބަހައްޓައިފިއެވެ. ކުރިން އައިސް އިން ފިރިހެން މީހާ އެ އިނީ، އެ “ދެމައިންނަށް” އޯޑަރު ދީގެންކަން ކަށަވަރެވެ. މިހައި ވަރަށް މި ވާހަކަ ލިޔުމުން، މި ލިޔުން ކިޔާ މީހުން ހީކޮށްފާނެއެވެ. އެކުވެރިއަކާ އެކު އައިސް، އޭނާ އެކަނިމައި އެކަނި މޭޒުމައްޗަށް ދޫކޮށްލާފައި، އަހަރެން މި ގަންނަނީ އެހެން ގަނޑެކެވެ. ނޫނެކެވެ. މިއީ ކުރިމަތީގައި ހުރި މޭޒެއްގައި ހިނގަމުން ދާ ކަމެއްކަމަށް ވާތީ، ހުރަހެއް ނެތި ފެންނަމުން އަންނަ މަންޒަރެކެވެ.

ކޮންމެއަކަސް އަހަރެމެންގެ އަމިއްލަ ވާހަކަތައް މެދު ނުކެނޑި ކުރިއަށްދާއިރު، ކުރިމަތީގައި ހުރި މޭޒުދޮށުގައި ތިބި ކުޑަ “ޢާއިލާ” ވެސް ކެއުމަށް އިންސާފުކުރަމުން ގެންދެއެވެ. ކައި ނިމިއްޖެއެވެ. ދުފަން ގެނެސްފިއެވެ. ފުރަތަމަ “ބައްޕަ”އެވެ. ދެން “މަންމަ”އެވެ. ދެން ކުޑަ “އަންހެންދަރި”އެވެ. އެ ކުއްޖާ ދުފަން އިންދާ، ވޭޓަރު އައިސް ކައިރީގައި ގެނެސް ބެހެއްޓީ، ސީޝާ (ދުންގުޑުގުޑާ) އެކެވެ. ހިތަށް އެރިއެވެ. މިހާރު ކުރަން މި އުޅެނީ ހާދަ ކަމުނުދާ ކަމެކެވެ. ކުޑަދަރިފުޅު ކައިރީގައި ބައިންދައިގެން، މަންމަ ވިޔަސް، ބައްޕަ ވިޔަސް ގުޑުގުޑާ ދަމާކަށް ނުވާނެއެވެ. ދައްކައި އެ ދެވެނީ ވަރަށް ކަމުނުދާ ނަމޫނާއެކެވެ.

އެކުވެރިޔާގާތު އެހެން ބުނާނެ ފުރުސަތެއް ނުލިބުނެވެ. ފެނުނީ ހީކުރިގޮތާ ދިމާ އިދިކޮޅު މަންޒަރެކެވެ. ގުޑުގުޑާގެ ނޮޅީގައި ހިފައި އަނގަޖެހީ، އެއްކަލަ ސާދަ ފަނަރަ އަހަރުގެ އަންހެން ކުއްޖާއެވެ. ދެ ލޯ ބޮޑުވެ، އާޝޯޚުވެފައި އެ މަންޒަރަށް ބަލަން ފެށުނެވެ. ނޮޅީގައި އަނގަޖަހައި، ދަމާލާފައި އަނގަ ފުރާ އޮލަ ދުއްތަން މުޅި ތަނަށް އެ ކުއްޖާ ބުރުވާންފެށިއެވެ. “މަންމަ” އާއި “ބައްޕަ” އެ މީހުންގެ އަމިއްލަ ވާހަކައިގައި ތިއްބެވެ. ހިތަށް އެރިއެވެ. އެ ތަނުގައި އެ ތިބީ، އޭނާގެ މަންމައާއި ބައްޕަ ބާވައެވެ؟

އެކުވެރިޔާއަށް މި މަންޒަރު ދައްކައިލުމުން، އޭނާވެސް ކޮސްވީ، އެހައި ކުޑަކުއްޖަކު އެ ފަދަ އަމަލެއް އެހައި ހާމަކަން ބޮޑުކޮށް ކުރާތީއެވެ. އަހަރެމެން އޭގެ ފަހުން ވެސް، ބައިގަޑިއެއްހައި އިރު އެތަނުގައި ތިބީމެވެ، ނިކުމެގެން އައި އިރުވެސް، އެ ކުއްޖާ ދުންބޯޓު ހެދިފައި އެތަނުގައި އިނެވެ.

ނިމުނީ

ނޯޓު: މި ބާވަތުގެ ހާދިސާއެއް އޮތް ނަމަ، ހިއްސާކޮށްލަ ދެއްވުން އެދެމެވެ. ޝުކުރިއްޔާ!