ނަޒަރާއި އަޑު 6

“ނަޒަރާއި އަޑު” މި ނަމުގައި އަޅުގަނޑު ލިޔަން މި ފަށަނީ، އަޅުގަނޑަށް ފެންނަ އަދި ތަޖުރިބާ ކުރެވޭ ކަންކަމާއި، އެކި މީސްމީހުން ކިޔައިދީފައި ހުންނަ މި ބާވަތުގެ ކަންކަމުގެ މައްޗަށް ކުރުކުރުކޮށް ލިޔާ ލިޔުންތަކެކެވެ. މި ލިޔުންތަކުން އެއްވެސް ސިފައެއްގައި ބަޔަކަށް ފައިދާއެއްކޮށްފި ނަމަ، އަޅުގަނޑުގެ މަޤުޞަދު ޙާޞިލުވީއެވެ.

އެކުވެރިކަމުގެ ދަޢުވަތު

މި ދިޔަ ބޮޑު ޗުއްޓީގެ ދުވަސްވަރެވެ. މެންދުރުކުރީގެ ވަގުތެކެވެ. ރައްޓެއްސަކާއެކު ކޮފީއެއްގައި އިންދާ، އެކުގައި މަސައްކަތްކުރާ އެކުވެރިއެއްގެ ފޯނުކޯލެއް އަތުވެއްޖެއެވެ. ލިބުނީ ދަޢުވަތެކެވެ. ދެ ދުވަހެއް ފަހުން، އަންނަ ހޯމަދުވަހެއްގެ މެންދުރުގެ ކެއުމަކަށް، އެ ގެއަށް ދިޔުމަށް ލިބުނު ވަރަށް ހިތްގައިމު ދަޢުވަތެވެ. ހިތްގައިމު ދަޢުވަތެކޭ މި ބުނީ ކެއުމަކަށް ދިން ދަޢުވަތަކަށް ވާތީއެވެ. އެހެންކަމުން އިތުރު ސުވާލެއް ވެސް ނެތި، ވަގުތުން “އިންޝާﷲ!” އޭ ބުނެފީމެވެ.

ކޮންމެއަކަސް ކެއުން ހަމަޖެހިފައިވާ ހޯމަދުވަސް އަތުވެއްޖެއެވެ. އެގާރަގަޑި ބައި އެހައިކަންހައިއިރު، އެކުވެރިޔާގެ ހަނދާންކޮށްދިނުމުގެ މެސެޖެއް ލިބުނެވެ. ހަނދާން ނެތިދާނޭކަމަށް އެކުވެރިޔާ ހީވީ ކަންނޭނގެއެވެ. އެހެންނަމަވެސް އެހެން ވާނެހެއްޔެވެ؟ ކެއުމެއް ވިއްޔާއެވެ! އެހެންކަމުން މެންދުރު ނަމާދުން ފައިބައިގެން، އެކެއް ޖަހަން ފަސް މިނެޓަށް ވެފައި ހުއްޓާ، އެކުވެރިޔާގެ ގެއާދިމާއަށް މިސްރާބު ޖަހައިފީމެވެ. ދައުވަތު އޮތީ އެކެއް ޖަހާއިރަށެވެ.

ދޮރުގައި ޓަކި ޖަހައިލުމާއެކު، ދޮރު ހުޅުވީ އެކުވެރިޔާއެވެ. ގެއަށް ވަންއިރު، އެހެން ރައްޓެއްސަކު ވެސް އެ ދައުވަތަށް އައިސް އިނެވެ. އޭރު މޭޒުމަތީގައި، ތަށިތައް ހުރީ އަތުރާފައެވެ. ކެއުން ހުރީ ތައްޔާރުގައެވެ. މާ ނޫންގޮތަކަށް ތަށިމައްޗަށް ކަޅި ހިންގައިލަމުން، ސޯފާގައި ޖައްސައިލީމެވެ. ދަޢުވަތު ދީފައިވާ މީހުންގެ ތެރެއިން އެކަކު އަދި ނާދެއެވެ.

އޭނާ އައީ އަހަރެމެން އެކިއެކި ވާހަކައިގައި އެހެން ތިބޭތާ، ފަރަނަ ވަރަކަށް މިނެޓު ފަހުންނެވެ. ކާތަކެތީން އަރަމުން އަންނަ މީރު ވަހާއެކު، ދަހިލަވާފައި އެހެން ތިބެ، އެތައް ޝަކުވާއެއް ކުރި ފަހުންނެވެ. އޭނާގެ ޖަވާބު ވެސް ފައްކަލެވެ. އެކެއްޖެހުމުގެ މާ ކުރިން ނިކުމެގެން ވެސް ހަމަ ވީވަރޯލައެވެ. މަގު އޮޅުނީއެއް ނޫނެވެ. ގަޑި އޮޅުނީއެއް ވެސް ނޫނެވެ. ކުށްވެރިވީ އޭނާގެ ދަތެވެ. ދަތުގެ ފަރުވާ ފަށައިގެން އުޅޭ ދުވަސްކޮޅެކެވެ.

ކޮންމެއަކަސް ވަގުތު ބޭކާރުކޮށްނުލައި، އެންމެން މޭޒުކައިރީގައި ހުރި ގޮނޑިތަކަށް ޖެހިލައިފީމެވެ. އަހަރެން ވެސް އެ ބައިގައި ހިމެނިގެންނެވެ. މޭޒުދޮށުގައި އިށީނދެ ރަނގަޅަށް ތަށިމައްޗަށް ބަލައިލިއިރު، ލައްކަ ސާމާނު ހުއްޓެވެ. ލިސްޓު ލިޔެނުލައި ދެން ކުރިއަކަށް ނުދާނަމެވެ. ގަދަ ފެހިކުލައިގައި ހުރި ބަތަކާއި ފަޅޯބަތެވެ. ރިހާކުރާއި ރިހާކުރު ދިޔައެވެ. ތެލުލިމަހާއި ތެލުލި މިރުހެވެ. ޅަހަނޑުލު ބަތްޕެނާއި ޖޫހެވެ. ލުނބޮލާއި މިރުހެވެ.

މީގެތެރެއިން އެންމެ އަޅައިގަތް އެއްޗަކީ ފެހިކުލައިގައި ހުރި ބަތެވެ. މިއީ ކޮން އެއްޗެއްތޯ އެކުވެރިޔާ ގާތު އަހައިލުމުން، ހީނލާފައި ބުނީ، މި ކެއުމުގެ އަސްލު އެއްޗަކީ ތިޔައީއެވެ. ދައުވަތު ދިނީ ވެސް ތިޔަ ބަތް ކާންދޭށެވެ. ތިޔަ ބަތް ކާ ކޮންމެ މީހަކު ވެސް، ތިޔަ ބަތަށް ވަރަށް ތަޢުރީފުކުރެއެވެ. ތިޔައީ މުރަނގަފަތު ބަތެވެ. އަޅެ ނިކަން ކަމުދޭތޯ ބަލައިލަބަލާށެވެ!

ހިތަށް އެރިއެވެ. މުރަނގަފަތް އަޅައިގެން މީހުން ބަތް ކައްކާ ހެއްޔެވެ؟ އެއީ ވަރަށް ހިތި ވެސް އެއްޗެކެވެ. އަނެއްކާ މިއިން ލާނީ ކޮން ފަދަ ރަހައެއް ބާވައެވެ؟ ހިތި ރަހަ ނޫން ރަހައެއް ލާނެ ބާވައެވެ؟ އެހެންކަމުން ގަޔާނުވާ ފާޑަކަށް އިނދެ، ހަމަ ވަރަށް ކުޑަ އެތިކޮޅެއް ތަށްޓަށް ވައްޓާލައިފައި، ރިހާކުރު ދިޔަފޮދެއް އަޅައި އެއްކޮށްލައިފީމެވެ. އަނގައަށް އެތިކޮޅެއް ލައި ހަފާލުމާއެކު….. ނޫނެކެވެ. ހީކުރި ގޮތެއް ނޫނެވެ. ވަރަށް މީރުވެއްޖެއެވެ.

މީރުވި ވަރުން، އަލުން ރަނގަޅަށް ތަށި ލަފާލައިފައި، ފިސާރި ރަނގަޅަށް ބަތް އަޅައިފީމެވެ. ރިހާކުރު ދިޔައާއި ތެލުލި މަހާއި ދެން ހުރި ސާމާނާއެކު، ގަޔާވެގެން ރަނގަޅަށް ކާން ފަށައިފީމެވެ. ފަޅޯ ބަތް ވެސް މީރެވެ. އެކަމަކު މުރަނގަފަތު ބަތް ވަރެއް ނޫނެވެ. ދެން ތިބި ދެ ވެރިން ވެސް، ވަރަށް މީރުވެގެން އެ ވާހަކަ ދައްކަމުން ކަމުން ގެންދިޔައެވެ.

ބަނޑުން ލޯއަޑު ކިޔާވަރަށް ކައި، ޖޫހާއި ބަތްޕެއް ބޮއިގެން ތެދުވިއިރު، މޭވާތަށި ހުރީ ތައްޔާރަށެވެ. ފޮތިކޮށްފައި ހުރި އާފަލާއި ޕެއަރޒްގެ އިތުރުން މޭބިސްކަދުރެވެ. މޭވާކޮޅެއް ވެސް ކައިލައިގެން ފެން ބޮއި ރަނގަޅަށް ހަމަޖެހިލުމަށްފަހު، އިރުކޮޅަކު ވާހަކަ ދައްކާލަން ތިބެފައި، އެކުވެރިޔާއަށް ހިތްހެޔޮކަމާއެކު ޝުކުރު އަދާކުރަމުން، އެ ގެއިން ނިކުތީ، އެ ކުޑަކުޑަ އާއިލާއަށް ހެޔޮދުޢާ ކުރަމުންނެވެ. މި ފަދަ އިތުރު ދަޢުވަތެއް ލިބޭނޭ ދުވަހަކަށް އިންތިޒާރު ވެސް ކުރަމުންނެވެ.

ނިމުނީ

ނޯޓު: މި ބާވަތުގެ ހާދިސާއެއް އޮތް ނަމަ، ހިއްސާކޮށްލަ ދެއްވުން އެދެމެވެ. ޝުކުރިއްޔާ!