“ރައްކާވެ ތިބިއްޔާ ދަތުރެވެ!”

ކޮވިޑް 19 ގެ ބިރުވެރިކަން މިއަދު މުޅި ދުނިޔެ މި އަންނަނީ، ހިތާމައާއި ހިތްދަތިކަމާއެކު ތަޖުރިބާ ކުރަމުންނެވެ. މި ވަބާ މުޅި ދުނިޔެއަށް މި ވަނީ ފެތުރި، އާންމުވެފައެވެ. ދުނިޔޭގެ އެންމެ ބޮޑެތި، އެންމެ ބާރުގަދަ ޤައުމުތަކުން ފެށިގެން، އާރެއް ބާރެއް ނެތް، ކުދި ޤައުމުތަކަށް ދާނދެނެވެ. ބޮޑެތި ބައްރުތަކާއި ކުދި ޖަޒީރާތައް ވެސް މެއެވެ. އޭގެ ތެރޭގައި އަޅުގަނޑުމެންގެ ދިވެހިރާއްޖެ ވެސް މި ވަނީ ހިމެނިފައެވެ. ﷲ ގެ ހެޔޮ ރަޙުމަތްފުޅުން، ދިވެހި ރާއްޖޭގައި އަދި މި ވައިރަހުގެ ނުރައްކާތެރިކަން ބޮޑުވެގެނެއް ނުދެއެވެ. އެ ފަދަ ގޮތެއް މިންވަރު ނުކުރެއްވުމަކީ، އަޅުގަނޑުމެން އެންމެންގެ ވެސް މިއަދުގެ އެންމެ ބޮޑު އެއް ދުޢާއެވެ.

ކޮވިޑް 19 ނުވަތަ ކޮރޯނާ ވައިރަސް ފެތުރި، އާންމުވެދާނެތީ، ހަމަ ކޮންމެ ފަރުދަކު ވެސް ކަންބޮޑުވެއެވެ. ބިރުގަނެއެވެ. މިއީ ކިހައި ނުރައްކާތެރި ވައިރަހެއްކަން ވެސް އެނގެއެވެ. މިއަށް ޚާއްޞަ ފަރުވާއެއް އުފެއްދިފައެއް ނެތެވެ. މިއިން ސަލާމަތްވެވޭނެ ވެކްސިނެއް އަދި ވުޖޫދެއް ނުވެއެވެ. ގައުމުތަކުން މަރުވަމުން ދާ މީހުންގެ އަދަދަށް ބަލައިމުން ވެސް ހާމަވަނީ، މި ވައިރަހުގެ ނުރައްކާތެރި ކަމެވެ. އެހެންކަމުން މި ވައިރަސް ފެތުރުން ހުއްޓުވުމަށް ޓަކައި، ކުރެވޭން ހުރި ހުރިހައި ކަމެއް ކުރުމަކީ، ހަމަ ކޮންމެ މީހެއްގެ ވެސް ވާޖިބެއްކަން ކަށަވަރެވެ. އެކަމަށް ޓަކައި ކުރެވޭނެ ކަންކަން އެބަ ހުއްޓެވެ.

ސަރުކާރުގެ ކަމާބެހޭ ފަރާތްތަކުންނާއި ޞިއްޙީ މާހިރުން މިއަދު އަޑަށް ބާރު ލައްވާފައި ތަކުރާރުކޮށް ވިދާޅުވާ އެއް ވާހަކަފުޅަކީ، ރައްޔިތުން ގެއިން ބޭރަށް ނުނިކުމެ، ގޭގައި ތިބުމަށް އެދިވަޑައިގެން ވިދާޅުވާ ވާހަކަފުޅެވެ. މި ވައިރަސް ފެތުރުން ހުއްޓުވުމަށް އެޅެން އޮތް އެންމެ ހަރުދަނާ އެއް ފިޔަވަޅަކީ، އެކަކު އަނެކަކާ ބައްދަލުނުވެ، އެކަހެރިކޮށް ތިބުމެވެ. މަގުމައްޗަށް ނިކުމެ، ގިނަ މީހުން އެއް ތަނަކަށް އެއްވެ، ވާހަކަ ދައްކައި، ހީސާމާސާ ކުރުން މި ދުވަސްކޮޅު މެދު ކަނޑާލައި، ކޮންމެ މީހަކު ވެސް އެ މީހެއްގެ ގޭގައި މަޑުކޮށްލައިގެން ތިބުމެވެ. މިސްކިތްތަކުގައި ޖަމާޢަތް ހަދައިގެން ނަމާދު ނުކުރަން އެންގުމާއި ހޮޓާ ރެސްޓޯރެންޓުތަކުގައި ތިބެ ކައިބޮއި ހެދުން މަނާކުރުން ފަދަ ކަންކަން ކޮށްފައި އެ ވަނީ، ހިތަށް ފަސޭހަވެގެނެއް ނޫނެވެ. މި ހިނދަން އެހެން ގޮތެއް ނެތުނީމައެވެ.

ކަމާބެހޭ ފަރާތްތަކުގެ ބަސް އަހައިގެން ގޭގައި ފޫހިކަމާއެކުގައި ނަމަވެސް، ވަގުތުތައް ހޭދަކުރާ މީހުން އެބަ ތިއްބެވެ. އެހެންނަމަވެސް ހިތާމައަކީ ރޭޑިޔޯ ޓީވީ މެދުވެރިކޮށާއި، މީސްމީޑިޔާގެ އެކިއެކި ވަޞީލަތްތައް މެދުވެރިކޮށް، އެކި ފަންނުގެ އެކި ބޭފުޅުން ކެނޑިނޭޅި މި ވާހަކަ ދައްކަވާއިރު ވެސް، މި އަޑު ނީވޭ ބަޔަކު، ނުވަތަ މި ކަމަކަށް ސަމާލުކަން ނުދޭ ބަޔަކު، މާލޭގެ މަގުތަކުން ފެންނަމުން ދިޔުމެވެ. މި ކަން ކުރިމަތިނުވާއިރު އުޅެމުން އައި ގޮތަށް، އާދައިގެ ހާލަތުގައި މަގުމަތީގައި އުޅެމުން ދިޔުމެވެ. ސައިކަލުގައި ބުރުޖެހުމާއި ކޮފީތަކަށް އެރުމާއި ރައްޓެހިންނާ ބައްދަލުކުރުމާއި ކަސްރަތުކުރަން ދިޔުމާއި މޫދަށްއެރުމާއި މި ފަދަ ހުރިހައި ކަމަކަށް ކުޑަވެސް ބަދަލެއް ނުގެންނަ ފަރާތްތައް އުޅޭކަމީ ހިތާމަހުރި ކަމެކެވެ.

މީގެ އެންމެ ބޮޑު ހިތާމައަކީ، މި ވައިރަހުން ތިމާގެ އަމިއްލަ ނަފުސު ސަލާމަތް ކުރުމަށް ޓަކައި، ނުކުރާން ބުނާ ކަންކަން ވެސް ކުރަމުން ގެންދާ މަންޒަރު ފެނުމެވެ. ސިއްޙީ މާހިރުންގެ އަބަދުގެ ވެސް އެއް ނަސޭހަތަކީ، ގިނަގިނައިން އަތް ދޮވުމާއި މޫނުގައި އަތް ނުލުމެވެ. އަތް ދޮންނަނީ ކިހައި ވަރަކަށް ކަމެއް ނޭނގެއެވެ. އެހެންނަމަވެސް އަތުން މޫނުފޮހުމާއި ލޯ ކެހުމާއި އިނގިލީގައި ދިއްވެފައި ހުންނަ ހަންކޮޅު ނުވަތަ ނިޔަފަތިކޮޅު ދަތުން ނައްޓާލުން ފަދަ އާދަތައް އަދިވެސް ބައެއް މީހުންގެ ކިބައިން ފެންނަމުން ދެއެވެ. މި ފަދަ ކަންކަމަކީ މި ދުވަސްވަރު ކުރަން އެއްވެސް ހާލެއްގައި ރައްކާތެރި ކަންކަމެއް ނޫނެވެ.

ދިވެހި ލޮބުވެތި ރައްޔިތުންނޭވެ! މިއަދު ދުނިޔެއާއި ޤައުމު މި އޮތީ އާދައިގެ ހާލަތެއްގައެއް ނޫނެވެ. އަހަރެމެންގެ އަމަލުތައް ބެހެއްޓޭ ގޮތަކުން ހަމަ ކޮންމެ ފަދަ ނަތީޖާއަކާ ވެސް ކުރިމަތިލާން ޖެހިދާނެއެވެ. އެހެންކަމުން ކަމާބެހޭ އިދާރާތަކުންނާއި ޞިއްޙީ ފަރާތްތަކުން އެދިވަޑައިގަންނަވާ ކަންކަމަށް ޚާއްޞަ ސަމާލުކަމެއް ދޭށެވެ! އެ ކަންކަމަށް ބޯ ލަނބައި ކިޔަމަންވާށެވެ! އެ ފަރާތްތަކުގެ އެންގެވުންތަކާ އެއް ގޮތަށް އަމަލުތައް ބައްޓަން ކުރާށެވެ! ގިނަގިނައިން އަތް ދޮންނާށެވެ! މޫނުގައި އަތް ނުލާށެވެ! ކެއްސައި ކިނބިހި އަޅާއިރު މޫނު ނިވާކުރާށެވެ! ގޭގައި ވަގުތުތައް ހޭދަކުރާށެވެ! އެ ވަގުތުތަކުގެ ބޭނުން ފައިދާހުރި ގޮތުގައި ހިފުމަށް ޓަކައި، ނަމާދުކޮށް، ޤުރުއާން ކިޔަވައި، މި ހާލަތުން ސަލާމަތްކޮށްދެއްވުން އެދި ﷲގެ ޙަޟުރަތުގައި ގިނަގިނައިން ދަންނަވާށެވެ! ގަދަ ކީރިތިވަންތަ މާތް ދޭވަތާއިންގެ ހެޔޮ ރަޙުމަތްފުޅާއެކު، މި ދުވަސް ފިއްލަވާށިއެވެ. އާމީން!