މިހިރީއެ ހާލަކީ އުޅޭ…

އަހަރެން އުޅެނީ ކޯހެއްގައެވެ. ކޯހެކޭ ބުނުމުން، އެއީ ކިހައި ވަރެއްގެ ސަކަރާތެއްކަން އެނގޭ ނޫން ހެއްޔެވެ؟ އުޅޭންޖެހޭ ގޮތުން، މި ހެދެނީ ގޯހެކޭ ވެސް ބައެއް ފަހަރު ހީވެއެވެ. ކިޔަންޖެހޭ ފޮތްތައް އިންތިހާއަށް ގިނަވީމައެވެ. ހަދަންޖެހޭ އެސައިންމަންޓުތައް، ގޮވާން ތައްޔާރުވެފައި ހުރި ބޮންތަކެއް ފަދައިން، ގޭތެރޭގައި ފުނިޖެހޭތީއެވެ. ތައްޔާރުކުރާންޖެހޭ ޕްރެޒެންޓޭޝަންތައް، ކުޅަނދުރުތަކެއްހެން، މޫނުތީގައި އެނބުރޭތީއެވެ. ޓެސްޓަކަށްފަހު ޓެސްޓެއް، ނަންނުގައްޗަކަށްވެގެން އައިސް، ކަރުގައި އޮޅިގަންނާތީއެވެ. އެހެންނަމަވެސް ދެން ކުރެވޭނެ ކަމެއް ނެތެވެ. މި އޮތީ މި ގޯސް ހެދިފައެވެ. މި މަޅިއަށް މެހިނުގަނެވުނު ނަމައޭ، ހިތަށްއަރާ ފަހަރުފަހަރު ވެސް މަދެއް ނޫނެވެ.

މިއަދަކީ ވެސް ބޮޑު ދުވަހެކެވެ. ދުނިޔެއަށްވުރެ ބޮޑު ދުވަހެކޭ ބުނުމުން، ދުވަހުގެ ބޮޑުކަން ވަޒަންކޮށްލާށެވެ. މި ރޭގެ 12:00 އަކީ، ކިރިޔާ ވެސް ކަތި ފިޔަވަޅެއް އެޅިއްޖެ ނަމަ، ބޮޑު ބޮމެއް ގޮވާނެ ވަގުތެވެ. ފޮތްތަކާއި ދިރާސާތައް ކިޔައި މަޢުލޫމާތުތައް އެއްކޮށް ގުޅަވަށައިގެން އައިސް، ލެޕްޓޮޕް ހުޅުވައިލީ، މި ރޭގެ ބާރަ ޖަހަންވާއިރަށް މި މުޞީބާތުން ސަލާމަތްކުރައްވާތޯ، ހިތާހިތުން ދުޢާކުރަމުންނެވެ. މި ކަމަކާހުރެ، މަގޭ ބަލިހާލުބޮޑު ދެ ލޯ ވެސް، މިހާރު މަ ކަހަލަ މީހެއްގެ ހަށިގަނޑުން ތަން ހޯދުނީތީ ދެރަވާނެ ކަންނޭނގެއެވެ. ހަމަ ގައިމު ވެސް، އެ ދެ ލޮލުގެ ހާލަތާމެދު ފިކުރުކޮށްލެވުމުން ސަހަރޯވެރިވެއެވެ.

ހެނދުނު ނުވައެއް ޖަހައި އެހައިކަންހައި އިރު، އެސައިންމަންޓުގެ ބުރަ، ކަވި މަސައްކަތް ފަށައިފީމެވެ. އެއްކުރި މައުލޫމާތުތައް ކިޔައި، ބައިބައިކޮށް ތަރުތީބުކުރަމުން، ރެފަރެންސްދެމުން، ލިޔަމުން ގެންދިޔައީމެވެ. ދަރިންކޮޅު ކޭތޯ ބަލަމެވެ. ފިރިމީހާ ބަނޑުހައިތޯ އަހަމެވެ. އެހެނަސް ކުރެވެނީ، އެސައިންމެންޓުގެ މަސައްކަތެވެ.

މި ކަމެއްގައި، މިހެން ގޮނޑިއަށް ފޫ ހަރައިގެން އިންނަތާ، ތިން ގަޑިއެއްހައި އިރު ވެދާނެއެވެ. އެސައިންމެންޓުން ވެސް ބޮޑު ބައެއް މިހިރަ ނިމެނީއެވެ. ހުރި އުފަލެއްގެ ބޮޑުކަމާއެވެ! ހިތަށް ވެރިވެފައިވާ ނުތަނަވަސްކަމުގެ ދިލަހޫނަށް، ޒާތެއްގެ ފިނިކަމެއް ލިބޭހެން ހީވެއެވެ.

މިހެން އިނދެއިނދެ މިހާރު ގޮނޑިއަށް މޫ ނުފައިބާކަމެއް ވެސް ނޭނގެއެވެ. ހަމަ ގައިމު ވެސް، ބުރަކަށިކޮޅު އައްސިވެއްޖެއެވެ. މި ވަގުތަށް މަސައްކަތް މެދުކަނޑާލައިފައި، ތެދުވާންވީއޭ ހިތަށް އަރާތާ ވެސް ދިހަ ވަރަކަށް މިނެޓު ވެދާނެއެވެ. އެހެން ހަމަ ހިތަށް އަރާއިރަށް، މިރޭގެ 12 ޖަހާއިރު އަޅާނެ ބިރުވެރި ރަނގަބީލުގެ އަޑު ކަންފަތުތެރޭގައި ގުގުމާން ފަށައެވެ. ބިރުން ފިތްކަނޑައިގެންދާ ފަދަ އަޑަކުންނެވެ. އެހެންވެ އަނެއްކާ ވެސް ގޮނޑީގައި ތަތްވަނީއެވެ.

މި ބިރުވެރިކަމުގެ ތެރޭގައި، ކީބޯޑުގެ ފިއްތަކުގައި ތަޅަތަޅައި އިންދާ، ކުއްލިއަކަށް ލެޕްޓޮޕުން ދުން އަރާހެން ހީވާން ފަށައިފިއެވެ. ފުރަތަމަ ވަރަށް ކުޑަކޮށް، އެ ކަހަލަ ހީއެއް ވެގެން އަޅައިނުލައި އިންދާ، މާ ބޮޑަށް ދުމުގެ އަސަރު ފާޅުވާން ފަށައިފިއެވެ. މި މަންޒަރުފެނިފައި، ގަންނާކުރެއްވި ބިރެއްގެ ސަބަބުން ފުންމައިގެން، އެއް ކަށްޓަކަށް ތެދުވެވިއްޖެއެވެ. ލިބުނު ސިހުމާއެކު ދުރަށްޖެހެމުން، އަޑަށް ބާރުލާފައި ފިރިމީހާއަށް ގޮވައިލެވުނީ، މި ފަދަ ކޮންމެ ނުރައްކަލެއްގެ އައްޑަނައަކީ އެއީ ކަމަށްވާތީއެވެ.

ލެޕްޓޮޕުގައި ރޯވެއްޖެއޭ ކިޔައި ހަޅޭއްލަވައިގަނެވުނު އަޑާއެކު، އައި ނައި ދިމާއެއް ނޭނގި، ފިރިސޮރު އައިސް، ވަގުތުން ލެޕޮޓޮޕް ނިވާލައިފިއެވެ. ޗާޖަރުގެ ވާގަނޑު ވެސް ދަމައިގެންފިއެވެ. މި ކަހަލަ ވަގުތެއްގައި، އެންމެ ރައްކާތެރި ގޮތަކީ އެއީ ޔޯލައެވެ. ލެޕްޓޮޕްގައި ރޯވިތޯ، ނުވަތަ ދުންއަރާތޯ ވެސް، އޭނާ ބެލީ އޭގެ ފަހުންނެވެ.

ކޮންމެއަކަސް އެކި އަރިއައަށް ޖަހައި، ފުރޮޅައި، ދެ ލޯޖަހައިގެން ބަލައި، އެކި ދިމަދިމާގައި ވަސްގަނެ ހަދާފައި އޭނާ ބުނީ، ލެޕްޓޮޕަށް އެއްވެސްކަމެއް ނުވާކަމަށެވެ. ނޫނެކޭ ހަމަ ދުންއެރިއޭ ކިޔައި، ދެ ލޯ ދެ ކާށިކިބަހެން ހަދައިގެން ހުރެ، ފިރިމީހާގެ މޫނަށް ބަލައިލެވުނުއިރު، ކަމަކުދާކަށް ނެތެވެ. އޭނާގެ މޫނާއި ބޮލުން ވެސް މިހިރަ އަރަނީ ދުމެވެ. މާތްކަލާކޯއެވެ! ނަގައިގަތް ހީބިހިގަނޑާއެކު، އަނެއްކާ ވެސް ފަހަތަށް ޖެހެވުނެވެ. މި ވަނީ ކީއް ބާވައެވެ؟ އެ ވަގުތު ހިތަށް އެރި އެއްޗަކުން، ކުރިމަތީގައި ހުރި މަސްޓޭންކަށް ބަލައިލެވުނެވެ. މަސްޓޭކުން ވެސް ދުން އަރާން ފަށައިފިއެވެ. ބަލައިލި ކޮންމެ ދިމާއެއްގައި ދުމެވެ. ވީ ގޮތް އެނގުނީ ފަހުންނެވެ. ލެޕްޓޮޕަށް ބަލަން އިނދެއިނދެ، މާ ބޮޑަށް ދެ ލޯ ފުސްވީއެވެ.

ޕަކަޕަކައަޅާފައި ފިރިސޮރު ހޭންފެށިއިރު، އަހަންނަށް ޖެހުނީ ތުންފިއްތައިގެން ރޯށެވެ. އެއޮތްވަރުން ކުރި މަސައްކަތް ސޭވްނުކޮށް ހުއްޓާ، އޭނާ ކަޑަބޮއްޖަހާފައި އައިސް ލެޕްޓޮޕް ނިވާލުމުން، އަހަންނަށް ވާނެ ގޮތް އިހުސާސްކޮށްލަ ބަލާށެވެ!

އެ ދުވަހުގެ މެންދުރުފަހުން ބޮޑުބައެއް ދިޔައީ ރުއިމާއި ގިސްލުމުގައެވެ. ހަވީރު އަނެއްކާ ވެސް ޖެހުނީ އެސައިންމަންޓުގެ މަސައްކަތް އައްވަލުން ފަށާށެވެ. މެންދަމު 12 ޖަހަންވާއިރަށް ނިންމާލެވުނީ ހަމަ ކިރިޔާއެވެ. ނަސީބުގައި ތަން އޮތީތީ، ފާޑަކަށެވެ. އޭރު ލެޕްޓޮޕުން ހެސްކިޔާފައި ދުން އަރައެވެ. އަޕްލޯޑުކޮށްފައި ތެދުވެ، އަރިއަރިމައްޗަށް ކަޅި ހިންގައިލިއިރު، ފަޅުވެ މަރުވެފައިވާ ގޭތެރޭގައި ވެސް ހުސް ދުމެވެ. އަޅައެއް ނުލަމެވެ. ދިޔަގޮތަށް ގޮސް ވަނީ ކޮޓަރިއަށެވެ.

ނިމުނީ