ރައްޓެއްސަކާއެކު ކޮފީއެއް ބޮއިލައިގެން ނިކުތް އިރު، އޭނާގެ ސައިކަލު އޭނާ ބެހެއްޓި ތަނުގައި ހުރިކަމަކަށް ނުވިއެވެ. ސައިކަލު ބެހެއްޓުނު ތަނެއް ވެސް އޭނާ ހަނދާނެއް ނެތެވެ. ޒޯނުގައި ހުރި ސައިކަލުތަކާ ދިމާއަށް އޭނާ ބަލަމުން ގެންދިޔައެވެ. އޭނާ ކަންބޮޑުވެފައި ހުރެ ތަކުރާރުކޮށް ބުނަމުން ގެންދިޔައީ އޭނާގެ ސައިކަލު ނެތްކަމަށެވެ. މާލެ ނާންނަތާ އެތައް ދުވަހެއްް ކޮށްފައި އޭނާ މާލެ އައީ މިއަދުއެވެ. ކޮފީއަށް އައިސް އެ އުޅެނީ ރައްޓެއްސެއްގެ ސައިކަލު ހޯދައިގެންނެވެ. އެ ސައިކަލުގެ ނަންބަރެއް ވެސް އޭނާ ހަނދާނެއް ނެތެވެ.
އެކުވެރިޔާ އައީ ވޭވް 125 އެއްގައިކަން ޔަޤީނެވެ. ސައިކަލުގެ ކުލައަކީ ނުލާއި ކަޅެވެ. އެ ކަން ވެސް އޭނާއަށް ކަށަވަރެވެ. އޭގެ ސައިކަލެއް ތަންކޮޅެއް ދުރުގައި ހުއްޓާ ފެނިއްޖެއެވެ. އެ ސައިކަލަށް ބަލައިލުމުގެ ފިކުރު ކުރިން ނައީ، އޭގެ މަތީގައި ޒުވާން ދެ ކުއްޖަކު ސިގިރެޓު ޖަހާލައިގެން ފޯނާ ކުޅެލަ ކުޅެލައި ތިބީމައެވެ. އެހެންނަމަވެސް އެންމެ ފަހުން އޭނާ ނިންމީ އެ ސައިކަލުގެ ކައިރިއަށް ވެސް ޖެހިލާށެވެ. އެ ހިސާބަށް ދެވުމާއެކު، އޭނާގެ މޫނުމަތި އަލިވެގެން ދިޔައެވެ. ކުރީން ހުރި ކަންބޮޑުވުމާއި ހާސްކަން ފިލައި ހިނގައްޖެއެވެ. އެ ދެ ޒުވާނުން ވަގުތު ފުރާލަން ޖައްސާލައިގެން އެ ތިބީ އޭނާ ހޯދަން އުޅޭ ސައިކަލު މަތީގައެވެ.
އެކުވެރިޔާ ގޮސް ސައިކަލު ކައިރިއަށް މަޑުކޮށްލުމާއެކު، އެ މީހުން ސައިކަލުން ފައިބައިފިއެވެ. އެއްޗެއް ނުބުނެއެވެ. “ސޮރީ” އޭ ބުނެނުލިތާނގައި ބަލައިވެސް ނުލިއެވެ. ފޯނާ ކުޅެމުން، އެއްފަރާތަކަށް ޖެހިލީއެވެ. އެކުވެރިޔާ ސައިކަލަށް އަރައި ނައްޓާލައިފިއެވެ. ދިޔަ މަގުމަތީގައި އޭނާ ދެއްކީ އެ ވާހަކައެވެ.
“މީސްމީހުންގެ ސައިކަލު މައްޗަށް އެހެން އަރައި ތިބޭނޭ ކަމަކަށް ހިޔެއް ނުކުރާނެއެއްނު.” އެކުވެރިޔާ ބުނެލިއެވެ.
ހިތަށް އެރިއެވެ. މި ތަރައްޤީ މާލެއަށް އެކުވެރިޔާ އަލީތާއެވެ. މި ތަނުގައި މި އޮތް ތަހުޒީބާއި ކުރިއެރުމުގެ ވައި ފެން އެކުވެރިޔާގެ ހަށިގަނޑުގައި ކުޑަކޮށް ވެސް ޖެހި ނުލަނީތާއެވެ. އެހެންނޫންނަމަ އޭނާ އެހެނެއް ނުބުނީހެވެ. މިއަދު މި މާލެއަކު އޭނާ އެބުނާ ކަހަލަ “މީހެއްގެ” އެއްޗެއް ނުހުންނާނެއެވެ. ގޭގޭގައި ވެސް، އަމިއްލަ އެއްޗެއް ނުހުންނަ ޒަމާނެއްގައި މަގުމަތީގައި ހުންނަ އެއްޗެހި އަމިއްލަ އެއްޗިއްސަށް ވާނޭ ހަމައެއް، ގޮތެއް، އޮންނާނީ ކޮންފަދައަކުން ހެއްޔެވެ؟
އެކުވެރިޔާގެ ވާހަކަ ބާއްވަމާ ހިނގާށެވެ! ޖެހިގެން އައި ދުވަހު، އޭނާ ރަށަށް ހިނގައްޖެއެވެ. އެހެންނަމަވެސް އޭނާ ދިޔުމަކުން، އޭނާއަށް ދިމާވި ކަންތައް މާލެއަކުން ފިލައިގެނެއް ނުދެއެވެ. މަގުމަތީގައި ޕާކުކޮށްފައި ހުންނަ ސައިކަލުތަކަކަށް ހަމަޖެހުމެއް ނުލިބެއެވެ. ދިވެހިން ވެސް، ބިދޭސީން ވެސް، މި ކަމުގައި ތަފާތެއް ނެތެވެ. ކޮންމެ މީހެއްގެ ކޮންމެ ކަހަލަ ސައިކަލެއްގެ މަތީގައި ވެސް އަރައި ޖައްސާލާންވީއެވެ. ވިސްނައިލާއިރު، އެއީ މާ ބޮޑުކަމެކޭ ހީ ނުވެދާނެއެވެ. ސައިކަލު ދުއްވަނީ ވެސް އެއަށް އަރައިގެންނެވެ. ޕާކުކޮށްފައި ހުންނައިރު، އެރުމަކުން މައްސަލައަކީ ކޮބައިހެއްޔެވެ؟
މައްސަލަ އެބަހުއްޓެވެ. ފުރަތަމަ ކަމަކީ އެއީ މީހެއްގެ އަގުބޮޑު މުދަލަކަށް ވުމެވެ. އެއްވެސް މީހަކަށް އަނެކާގެ މުދަލެއްގައި، އޭނާގެ ހުއްދަނެތި އަތް ވެސް ލެވިގެން ނުވާނެއެވެ. އެއީ ގޯހެކެވެ. މި ހެން އޮތް ކަމެއްގައި، އެއަށް ސަވާރުވެގެން އިނުން ގޯހަކަށް ނުވާނޭ ގޮތެއް އޮންނާނޭ ހެއްޔެވެ؟ ބައެއް ފަހަރު އެންމެ މީހެއް ވެސް ނޫނެވެ. ދެ މީހުން ތިން މީހުން ވެސް އަރައި ތިބެދާނެއެވެ. އޮށޯވެލައިގެން ތިބޭތަން ވެސް ފެނެއެވެ. އޭރު ޖައްސާފައި ހުންނާނީ ބަލިކަށި އެންމެ ހަރެކެވެ. އެ ހަރު ހުންނާނީ ހޯހޯ ގޮވަގޮވައެވެ. ކުކުރައިލަ ކުކުރައިލައެވެ. ފަސްދޮޅަސް ހަތްދިހަ ހާސް ރުފިޔާ ދީފައި ގަންނަ ސައިކަލުގެ ހަރު، ދެތިން ދުވަސް ތެރޭ ބަދަލުކުރާން ޖެހުމަކީ ވެސް ވެފައި ހުރި ކަންކަމެވެ.
ސައިކަލު މައްޗަށް މި ގޮތަށް އަރައި ތިބޭ މީހުން، ހަމައެކަނި އަރައި ރީތިކޮށް ތިބެނީއެއް ވެސް ނޫނެވެ. އެހެން ތިބެގެން ގަސްދުގައި، ނުވަތަ ބޭއިޚުތިޔާރުގައި ނަމަވެސް، އޭގައި ހުންނަ އެކިއެކި ސުވިޗުތަކާއި ތަންތަނަށް ފިތައި، އޮބައި، އަނބުރާ ހަދާފައި ހުންނަނީ މަދެއްކޮށެއް ނޫނެެވެ. ކުކުޅެއްގެ ކަރު އަނބުރާލާފައި އިންނަހެން ލޯގަނޑު އަނބުރާލާފައި ހުރެދާނެއެވެ. ރޯކޮށްފައި ހުންނަ ސިގިރެޓުގެ ކޮޅުން، ސައިކަލުގެ ތަންތަނުގައި ލަކުނު ލައްވާފައި ހުރެދާނެއެވެ. މުށްގަނޑު “ފެލާލައިގެން” ވެސް ކިތަންމެ އިރަކު އިނދެދާނެއެވެ. ޗޯކުކޮށްފައި ވެސް ހުންނަނީ މަދެއްކޮށެއް ނޫނެވެ. ބޯން އިންނަ ސިގިރެޓުގެ އަޅިން މުޅި ސައިކަލު ފެންވަރުވާލާފައި ހުންނަ މަންޒަރަކީ ވެސް އާންމު މަންޒަރެކެވެ. މިއިން އެއް ކަމަކީ ވެސް، އޭގެ ވެރިފަރާތް ހިތާވާ، ރުހޭ ކަމަކަށް ނުވާނެއެވެ. ހިތަށް ނުހަނު ތަދުވާނެ މަންޒަރެކެވެ.
މިއީ މިއަދު ވަރަށް ބޮޑުވެފައި އޮތް މައްސަލައެކެވެ. މާލޭގައި ސައިކަލު ދުއްވާ އުޅޭ ހަމަ ކޮންމެ މީހަކަށް ވެސް މި ހިތްދަތި ހާލަތާ ކުރިމަތިލާން ޖެހޭނޭކަން ހަމަ ޔަގީނެވެ. ހިތާމައަކީ މި ކަންކަން ކުރާ ފަރާތްތަކުން، މި ކަންކަމާ މެދު ނުވިސްނާކަމެވެ. މިއީ ތަހުޒީބު ބަޔަކުގެ ކިބައިން ފެންނާނޭ ސިފައެއް ކަމަކަަށް ގަބޫލެއް ނުކުރެވެއެވެ. ތަރައްޤީވެ ކުރިއަރާފައިވާ ގައުމުތަކުގެ މީހުންނަށް މި ފަދަ މަންޒަރުތައް ފެނުމުން، އެ މީހުން މި ކަންކަން ސިފަކުރާނީ ނާތަހުޒީބު، ދަށް ފެންވަރުގެ އަމަލެއްގެ ގޮތުގައެވެ. އެއީ މަގުގެ އެއް ފަރާތުގައި ބަހައްޓާފައި ހުރި، ކޮޅުފިލާ ގޮނޑިއެއް ނޫންކަން އެ މީހުންނަށް ވެސް އެނގޭނެއެވެ.
Be the first to comment