ބެލެނިވެރީންނަށް….

ފެށިގެން މިދަނީ އަހަރުގެ ބޮޑު ޗުއްޓީގެ ދުވަސްވަރެވެ. ކިޔަވާކުދީންނާ ކުރިމަތިވާ އުފާވެރި ޢީދެއް ފަދަ ދުވަސްވަރެވެ. އަހަރުގެ އެތައް ދުވަހަކު ކިޔެވުމުގެ ބުރައިގެ ތެރޭގައި އުޅެފައި، ސިކުނޑިއަށް އަރާމުކޮށްލާނޭ ފުރުޞަތެއް ދީ، ހިތް އުފާކޮށްލާން ލިބޭ ދުވަސްވަރެވެ. އާއިލާގެ މީހުންނާއި ގާތް ރައްޓެހީންނާ ބައްދަލުކޮށްލައި މަޖާކޮށްލާން ލިބޭ ދުވަސްވަރެވެ. މައިންބަފައިންނަށް، އެމީހުންގެ ހައްޓަން ލިބުނު ވަރުބަލިކަން ފިލުވައިލައި، ހަށިގަނޑު ދަމައިލާން ލިބުނު ދުވަސްވަރެވެ.

މި އުފާވެރި ދުވަސްވަރު މިހާރު މި އޮތީ ފެށިފައެވެ. ކިޔަވާކުދީން ފުރަފުރައިގެން އެކި ދިމަދިމާއަށް ދަތުރުކުރަނީއެވެ. ރަށްރަށުގައި ކިޔަވާން ތިބޭ ގިނަ ކުދީން، އެ ކުދީންގެ އުފަން ރަށަށެވެ. މައިން ބަފައިންގެ ގާތަށެވެ. ނުވަތަ އާއިލާގެ މީހުންނާއި ރައްޓެހީންގެ ގާތަށެވެ. އަމިއްލަ ރަށުގައި ތިބެގެން ކިޔަވާ ކުދީން، ކޮންމެވެސް އެހެން ރަށަކަށެވެ. ނުވަތަ އެހެން ގައުމަކަށެވެ. އެއްވެސް ތަނަކަށް ނުގޮސް، އެ ތިބި ފަސްގަނޑުގައި ތިބޭ ކުދީން ވެސް މަދު ނުވެދާނެއެވެ. އެހެންނަމަވެސް އެ ކުދީން ވެސް އަންނާނީ، ޗުއްޓީގެ އުފާވެރިން އެންމެ ފުރިހަމަ ގޮތުގައި ލިބިގަންނަމުންނެވެ.

މައިން ބަފައިން އެ ބައިމީހުންގެ ކުދި ދަރީންކޮޅު ގޮވައިގެން ނުކުމެ، މި އުފަލުގައި ބައިވެރިވަމުން އަންނައިރު، ޗުއްޓީއަށް ލިބުނު ދޮޅުމަހެއްހައި ދުވަހަކީ، ހަމައެކަނި ކުޅިވަރާއި މަޖަލުގެ ދުވަސްކޮޅަކަށް ހަދާލައިފި ނަމަ، ފަހަރުގައި މި ދުވަސްތަކުގެ ބޭނުން އެ ހިފުނީ އެންމެ އެދެވޭގޮތުގައި ނޫންކަމަށް ވެދާނެއެވެ. އެހެންކަމުން، ހިނގަމުން މިދާ ޗުއްޓީގެ ދުވަސްވަރު މަޖަލަށް، ފިންޏަށް ދުއްވާލުމުގެ ކުރީން، ވިސްނައިލާން ޖެހޭ ބައެއް ކަންކަން ހުރިކަން ހަނދާން ބަހައްޓާން އެބަ ޖެހެއެވެ.

ނިމިގެން މި ދާ އަހަރު ދަރީން ވަނީ ވަރަށް ބުރަކޮށް މަސައްކަތް ކޮށްފައެވެ. ރަނގަޅު ނަތީޖާއެއް ވެސް ހޯދާފައެވެ. އަންނަ އަހަރަކީ މިއަހަރަށްވުރެ މަތީ ގުރޭޑަކަށް ގޮސް، މި އަހަރު ކިޔެވި އެއްޗިއްސަށްވުރެ އުނދަގޫ، މުޅީން އައު އެތައް އެއްޗެއް ކިޔަވާން ފަށާނޭ އަހަރެކެވެ. އެހެންކަމުން އެ ދުވަހަށްޓަކައި މި ދުވަސްވަރު، ކޮންމެވެސް މިންވަރަކަށް މަސައްކަތް ކުރާން އެބަ ޖެހެއެވެ. ފޮތެއްގައި އަތްޖައްސާނުލައި، މުޅި ޗުއްޓީ އެކީގައި ދުއްވާލުމުގެ ބަދަލުގައި، ކިޔެވި އެއްޗެހި މުޠާލިޢާ ކޮށްލައި، އަންނަ އަހަރު ކިޔަވާން ހުރި ބައެއް އެއްޗެހި ބަލައިލައި ހަދައިލުމަކީ، ވަރަށް ބޭނުންތެރި، ފައިދާހުރި ކަމަކަށް ވާނެއެވެ.

ޗުއްޓީގެ ދުވަސްތައް ފެށި ނިމޭންދެން، ދަރީންނަށް ވަރަށް ފުޅާ ދާއިރާއެއްގައި މިނިވަންކަން ދެވޭގޮތް ވުމަކީ، ވަރަށް ގިނަ މައިންބަފައިންނަށް ކުރެވޭ ކަމެކެވެ. ދަރީންނަށް މިނިވަންކަން ދޭން ޖެހޭނެއެވެ. އެކަމާ އިދިކޮޅަށް އެއްޗެއް ބުނާން އުޅެނީއެއް ނޫނެވެ. އެހެންނަމަވެސް މިނިވަންކަން ދޭއިރު، އެ ކަމުގައި ވަކި ހުދޫދެއް ގެންގުޅުމަކީ ވަރަށް މުހިންމު ކަމެކެވެ. ދަރިފުޅު އުޅޭނޭހައި ގޮތަކަށް އުޅޭން ދޫކޮށްލައިގެން ނުވާނެއެވެ. ކުރާނޭހައި ކަމެއް ކުރާން ވެސް ދޫކޮށްލައިގެން ނުވާނެއެވެ. ކިޔެވުމުގެ ދުވަސްތަކުގައި، ދަރިފުޅަށް ދިން ސަމާލުކަމަށްވުރެ ބޮޑު ސަމާލުކަމެއް، މި ދުވަސްވަރު ދަރީންނަށް ދޭން ޖެހޭނެއެވެ. އެހެންނޫނީ ބޭނުންނުވާ ގޯޅިއަކަށް ދަރިފުޅަށް އެޅެވި، ހިތް ނޭދޭ މަންޒިލަކަށް ދަރިފުޅަށް ދަތުރު ކުރެވިދާނެއެވެ.

ބައެއް ބެލެނިވެރީންނާއި މައިން ބަފައިންނަށް ބައެއް ފަހަރު ކަންކުރެވޭ ގޮތަކީ، ދަރިފުޅު ގޮވައިގެން ޗުއްޓީ ހޭދަކޮށްލާން ކޮންމެވެސް ރަށަކަށް ގޮސް، ދަރިފުޅަށް ފުރިހަމަ މިނިވަންކަން ދީފައި، އުޅޭނޭ ގޮތަކަށް އުޅޭން ދޫކޮށްލެވެނީއެވެ. މި ހެން މި ކަން ކުރުމުން، ދެން ނިކުންނަ ނަތީޖާ ވަރަށް ވޭންގަދަވެފައި އެބަ ހުއްޓެވެ. މުޅި އަހަރު ދަރިފުޅަށް ދިން ނަސޭޙަތާއި، ދިން ތަރުބިއްޔަތު، ކަނޑުގައި އެޅި ރޮނގަކަށްވެ ނިމިފައި ވަނީ މަދެއްކޮށެއް ނޫނެވެ. ރަށްރަށުން ބައްދަލުވެ، އެކުވެރިކަން އުފެދޭ ކުދީންނާ އެކު، ބައިހަދާފައި ތަންތަނަށް ގޮސް، ވިޔާނުދާ ކަންކަމުގައި ބައިވެރިވެވިފައި ހުންނަނީ ވެސް މަދެއްކޮށެއް ނޫނެވެ. ސިގިރެޓު ބުއިމާއި މަސްތުވާތަކެއްޗާ ދިމާއަށް ދަތުރުކުރެވުމަކީ ވެސް ހަމަ ވެދާނެ ގޮތެކެވެ. އެހެންކަމުން ދަރިފުޅު ގޮވައިގެން ޗުއްޓީ ހަދައިލަން ތަންތަނަށް ގޮސް އުޅޭއިރު، ދަރިފުޅު އުޅޭގޮތާއި ކުރާ ކަންކަން ވަރަށް ގާތުން އަބަދުވެސް ބަލާންވާނެއެވެ.

ދެން އޮތީ އެންމެ މުހިންމު ކަންތަކުގެ ވާހަކައެވެ. ދީނީ އަޅުކަމުގެ ވާހަކައެވެ. ކިޔެވުމުގެ ދުވަސްވަރު، ގިނަ މައިން ބަފައިން ދަރިންލައްވާ ގަވާއިދުން ނަމާދުކުރުވުމަށް ނުހަނު ބޮޑަށް މަސައްކަތް ކުރެއެވެ. މިސްކިތްތަކަށް ބަލައިލުމުން އެކަން އެނގެއެވެ. މަޤުޞަދަކީ ދަރީންގެ ހިތުގައި ނަމާދަށާއި ދީނީ އެހެނިހެން އަޅުކަންތަކަށް ހިތްޖެއްސުމެވެ. އެހެންނަމަވެސް ޗުއްޓީގެ ދުވަސްވަރު ފެށުމުން، މިކަންކަމަށް ކުރީން ދެވުނު ސަމާލުކަން ކުޑަކުރެވެއެވެ. ނަމާދު ކުރުމަށާއި، ގަވާއިދުން ކިޔަވަމުން އައި ޤުރުއާން ކިޔެވުމަށް ހަނދާންކޮށް ނުދެވޭ ފަހަރު އާދެއެވެ. ނަތީޖާއަކީ ޗުއްޓީ ނިމި، ދިރާސީ އާ އަހަރު ފެށޭއިރު، ނަމާދުކުރުމަށާއި ޤުރުއާން ކިޔެވުމަށް ދަރީންގެ ހިތްތަކުގައި އުފެދިފައިވާ ޝައުޤުވެރިކަން ކުޑަވުމެވެ.

ކިޔަވާކުދީންނަށާއި ބެލެނިވެރީންނަށް މިއަދު ލިބިފައިމިވާ އުފާވެރި ދުވަސްކޮޅުގެ ބޭނުން، އެންމެ އެދެވޭ ގޮތުގައި ހިފުމަކީ، ވަރަށް ބޮޑަށް ސަމާލުކަން ދޭންޖެހޭނޭ ކަމެކެވެ. އެޅޭ ކަތި ފިޔަވަޅެއްގެ ސަބަބުން، ނުވަތަ ފަރުވާ ކުޑަކޮށްލެވޭ ކުޑަކުޑަ ކަމަކުން، ދަރީންނަށް ޓަކައި މުޅި އަހަރު އުފުލި ބުރައާއި، ދިން ތަރު ބިއްޔަތު، ގެއްލިގެން ހިނގައިދާނެއެވެ. އެހެންކަމުން މި ދުވަސްވަރު ވެސް ދަރީންގެ ކަންކަމަށް އިހުނެކޭ އެއްފަދައިން ސަމާލުކަން ދޭށެވެ! ދަރީންގެ ތަޢުލީމަށެވެ. އެކުވެރީންނާއެކު ދާ ތަންތަނަށެވެ. އުޅޭ އުޅުމަށެވެ. ވަކީން ޚާއްޞަކޮށް ދީނީ އަޅުކަންތަކަށެވެ.

ނިމުނީ