ދާދިފަހުގެ ދުވަހެކެވެ. ހަވީރުގެ ވަގުތެވެ. މަގުމަތީގައި މީހުން މަދެއް ނޫނެވެ. އަހަރެންގެ ކުރިން ޓެކްސީއެއް ދުއްވާފައި ދެއެވެ. މާ ހަރު ދުވެއްޔެއްގައެއް ނޫނެވެ. އަހަރެން ވެސް ދުއްވަމުން ދިޔައީ، ހަމަ އެ ފަދަ ދުވެއްޔެއްގައެވެ. މަގުގެ ދެ ފަރާތުން ހިނގާ މީހުން ވެސް ކޮޅުކޮޅަށް ދަތުރުކުރެއެވެ. މަގު އޮތީ އާދައިގެ ހާލަތެއްގައެވެ.
އިރުކޮޅަކުން ފަހަތުން ގަދަފަދަ އަޑުފަށްގަނޑަކާއެކު، ވައިރޯޅިއާ ވާދަކުރާ ފަދަ ދުވެއްޔެއްގައި ދުއްވާފައި އަންނަ ސައިކަލެއްގެ އަޑު އިވިއްޖެއެވެ. އަރާ ހަމަކޮށް ފަސްދީފިއެވެ. ކަންފަތް ބަށްކޮށްލާފައެވެ. އޭގައި ތިބީ ޒުވާން ފުރައިގެ ދެ ސޮރެވެ. މަގަކީ ހަނި މަގެކެވެ. އެހެންނަމަވެސް ފަރިތަކަމާއެކު ނަންނުގަތީގެ ދުވެއްޔަށް ދުއްވާފައި ގޮސް، ކުރީގައި އޮތް ޓެކްސީން ނައްޓައި، ކުރިއަށް އަރަން އުޅުމުގެ ތެރޭގައި، ޓެކްސީގެ އެއް ފަރާތުގައި ސައިލްގެ ހުންގާނުގެ ކޮޅު ޖެހި ކާރުން ތަންކޮޅެއް ގޭނިއްޖެއެވެ.
ޓެކްސީ މަޑުކޮށްފިއެވެ. ސައިކަލް ވެސް މަޑުކޮށްފިއެވެ. ޓެކްސީން ފޭބީ އުމުރުން ދުވަސްވެލާފައި ހުރި މީހެކެވެ. ފޭބިއިރު ވެސް އޭނާ ހުރީ ވާނެ ހަތަރެއްޗެއްވެ ނިމިފައެވެ. އޭނާ ބޯ އަރިކޮށް ކާރަށް ބަލައިލިއެވެ. ހެޔޮވަރުގެ ކޫރެއް އެޅިފައި ހުއްޓެވެ. މި ތަން ފެނިފައި އޭނާގެ ރުޅި ހައްދުން ނައްޓައިފިއެވެ. ފުރަތަމަ ވެސް އެ ދެ ސޮރާ ދިމާއަށް، ހެއްދެވި ނެހެއްދެވިއަށް ގޮވައިގަތީއެވެ. އެ ވެރިން ވެސް ދުލެއް ނުކުރިއެވެ. އޭނާއަށް ވުރެ ބާރަށް، އަމުދުން ހުތުރު ބަހުން ހަޅޭއްފަޅޭއް ޖަހައިގެންފިއެވެ. ޑްރައިވަރު އެއްޗެހި ކިޔަމުން ގޮސް ކާރަށް އަރައިފިއެވެ. އެހެންނަމަވެސް އެ ދެ ސޮރު ހުއްޓައެއް ނުލައެވެ. ސައިކަލުން ފައިބައިގެން އައިސް، ޓެކްސީގެ ދޮރުފަތް ހުޅުވައިގެން ވެސް އެ މީހާއާ ދިމާއަށް ހަޅޭއްލެވިއެވެ. ސައިކަލަށް އަރައި ނައްޓާލަމުން ކޮންމެ މީހަކުވެސް ފައި ކުރުކޮށްފައި، ޓެކްސީގައި ފައިން ބޮނޑިއެއް އެޅިއެވެ. އަހަންނަށް އިނދެވުނީ ބަސްހުއްޓިފައެވެ.
އެހެން ދުވަހެކެވެ. މިއީ ވެސް ހަމަ މި ފަދަ ކަމެކެވެ. ކަން ހިނގަން މެދުވެރިވި ސަބަބެއް ސީދާ ބުނާކަށް ނޭނގެއެވެ. އަހަންނަށް އެ ހިސާބަށް ދެވުނުއިރު، ފެންނަން އޮތީ ހިތަށް އުނދަގޫކުރާ ފަދަ މަންޒަރެކެވެ. މި ފަހަރު ވެސް ޓެކްސީ އެކެވެ. ޒުވާން ފިރިހެން ކުއްޖަކު، ޓެކްސީގެ ކުރިމައްޗަށް ސައިކަލް ހުރަސްކޮށްލައިގެން، އޭގެ މަތީގައި އަރިއަކަށް ޖައްސާލައިގެން އިނެވެ. އެ ސޮރު އިނީ ރުޅި އައިސް ރަތްވެފައެވެ. އިނދެގެން ކިޔަނީ ދެން ނިކަން ގޮސްބަލާށެވެ! މަށަށް ވެސް ޖެއްސުން ކުރަން އެނގޭކަން ދައްކައިލާނަމެވެ. މި ކަހަލަ ބަނދިވަރެކެވެ.
ގިނަ އިރުތަކެއް ނުވިއެވެ. މަގު ބުލޮކް ވެއްޖެއެވެ. ބަރުގޮނުގެ އަޑުން މުޅިތަން އަޑުބައްދާލައިފިއެވެ. ޒުވާނާގެ ހިތަށް ކަހެރުވަކެކޭ ވެސް ހީނުވެއެވެ. އެހެންނަމަވެސް ފަހަތުން މީހުންގަނޑު ހަޅޭއްފަޅޭއް ޖަހަންފެށުމުން، އިންނާކަށް ނުކެރުނެވެ. ކާރުމަތީގައި ގޮށްމުށް ކަވާފައި އެތިފަހަރެއް ޖަހަމުން ތި…. އަށް ހޭއަރުވައިލާނަމޭ ބުނެފައި، ސައިކަލަށް އަރައިގެން ނައްޓާލައިފިއެވެ. ސަހަރޯއޭ ހިތަށް އެރިއެވެ. އިރު އަރައި އޮއްސޭއިރު، މި ފަދަ ކިތަން ކަންތައް މި މާލޭގައި ހިނގާނެބާވައެވެ.
މިއީ މިއަދު މި ގައުމުގެ ހާލަތެވެ. ހެޔޮވާނީ ކިހިނެއް ހެއްޔެވެ؟ އެއްވެސް މީހަކު އަނެކަކަށް ދޫކޮށްގެން ވާކަށް ނެތެވެ. ތިމާއަށް ވުރެ ވަކިން ބާރުގަދަ މީހަކު، ކެރޭ މީހަކު ނެތްކަން ދައްކަން މަސައްކަތް ކުރާއިރު، އަހަރެމެންގެ އޮތީ ކޮން ބާރެއް ހެއްޔެވެ؟ އެންމެ ކުޑަމިނުން އެސްފިޔަ ވެސް ޖަހައި މި ލެވެނީ، އެކަމުގެ ކުޅަދާނަކަން ވަކި ފަރާތަކުން ދެއްވީމައެވެ. މީހެއްގެ މުދަލެއްގައި ފައި ކުރުކޮށްފައި ޖަހާއިރު، ގޮށް މުށްކަވާފައި ޖަހާއިރު، އެފައިގެ ނުވަތަ އެ އަތުގެ މާދަމާގެ ހާލަތެއް އެނގެނީ ކާކަށް ހެއްޔެވެ؟ ނިކަން ވިސްނައި ފިކުރުކޮށްބަލާށެވެ!
ހަރު އަޑުން މޮޅު ބަސް ބުނެ، މޭ ފުއްޕައި މަތިހަށި ނަގައިފައި މީހުންނާ ދިމާކުރަން، ނުވަތަ ތަންތަން ހަލާކުކޮށް ސުންނާފަތި ކުރަން ދުވާއިރު، އަހަރެމެން އިންސާނުންނަކީ ކިހާވަރެއްގެ ނިކަމެތި ބައެއް ކަމާމެދު ވިސްނައިލިން ހެއްޔެވެ؟ ދުނިޔެއަށް ފޮނުއްވި އުޞޫލުން ގެންދަވާނެއެވެ. ގެންދަވާނީ ކޮން ވަގުތަކުކަން އެނގޭ މީހަކު ނޭޅެއެވެ. އެހެންކަމުން އެކަމަށް އަބަދުވެސް ހޭއަރަން އެބަ ޖެހެއެވެ. މީހަކު ތިމާއާ ދޭތެރޭ ނުކިއްސަރު ގޮތަކަށް ކަމެއް ކުރާހައި ފަހަރަކު، އެ މީހަކު ފަހައި ދުވުމުގެ ބަދަލުގައި، އެއީ ވެސް ހަމަ އަހަރެމެން ފަދަ އިންސާނެއްކަން ހަނދާން ބަހައްޓާށެވެ!
މީހަކަށް ކަމެއް ކުރެވިދާނެއެވެ. އެ ފަދަ ކޮންމެ ވަގުތަކީ ރުޅި އިސްކުރަންޖެހޭ ފަދަ ވަގުތަކަށް ނަހަދާށެވެ! ދެ ފަރާތުން ވެސް މަސްލަޙަތަށް އިސްކަންދޭށެވެ! އެންމެ ރީތި، މޮޅު ގޮތަކީ، ކުށެއް ކުރެވިއްޖެނަމަ، އެ ކަމަށް މާފަށް އެދުމެވެ. ނޭނގިގެން ކަމަށް ވިޔަސް، އެނގިގެން ކަމަށް ވިޔަސް، ވީ އެންމެ އަވަހަކަށް މާފަށް އެދޭށެވެ! އަދި މީހަކަށް ކުށެއް ކުރެވިގެން އެކަމަށް މާފަށް އެދިއްޖެ ނަމަ، އެންމެ ރީތި ގޮތަކީ އެމީހަކަށް މާފު ދިނުމެވެ. ދީނީ ނަޒަރަކުން ބެއްޔަސް މިއަށް ވުރެ ވަކިން ރަނގަޅު މޮޅު އިތުރު ގޮތެއް ނޯންނާނެއެވެ. މި ކަހަލަ ކަންކަމާ ދޭތެރޭ މިއަދުގެ މުޖުތަމަޢު ވިސްނާނެ ނަމަ ކޮންފަދަ ހެއްޔެވެ.
ނޯޓު: މިއީ 12 އޭޕްރީލް 2012 ގައި ސަން އޮންލައިންގައި އަޅުގަނޑު ލިޔެފައިވާ ލިޔުމެކެވެ.
Be the first to comment